Greek Reader — Euripides The Trojan Women (740–779)

Euripides The Trojan Women 740–779

Ἀνδρομάχη

740 ὦ φίλτατ’ , ὦ περισσὰ τιμηθεὶς τέκνον ,

741 θανῇ πρὸς ἐχθρῶν μητέρ’ ἀθλίαν λιπών ,

742 ἡ τοῦ πατρὸς δέ σ’ εὐγένει’ ἀποκτενεῖ ,

743 ἣ τοῖσιν ἄλλοις γίγνεται σωτηρία ,

744 τὸ δ’ ἐσθλὸν οὐκ ἐς καιρὸν ἦλθε σοὶ πατρός .

745 ὦ λέκτρα τἀμὰ δυστυχῆ τε καὶ γάμοι ,

746 οἷς ἦλθον ἐς μέλαθρον Ἕκτορός ποτε ,

747 οὐ σφάγιον υἱὸν Δαναΐδαις τέξουσ’ ἐμόν ,

748 ἀλλ’ ὡς τύραννον Ἀσιάδος πολυσπόρου .

749 ὦ παῖ , δακρύεις · αἰσθάνῃ κακῶν σέθεν ;

750 τί μου δέδραξαι χερσὶ κἀντέχῃ πέπλων ,

751 νεοσσὸς ὡσεὶ πτέρυγας ἐσπίτνων ἐμάς ;

752 οὐκ εἶσιν Ἕκτωρ κλεινὸν ἁρπάσας δόρυ

753 γῆς ἐξανελθὼν σοὶ φέρων σωτηρίαν ,

754 οὐ συγγένεια πατρός , οὐκ ἰσχὺς Φρυγῶν ·

755 λυγρὸν δὲ πήδημ’ ἐς τράχηλον ὑψόθεν

756 πεσὼν ἀνοίκτως , πνεῦμ’ ἀπορρήξεις σέθεν .

757 ὦ νέον ὑπαγκάλισμα μητρὶ φίλτατον ,

758 ὦ χρωτὸς ἡδὺ πνεῦμα · διὰ κενῆς ἄρα

759 ἐν σπαργάνοις σε μαστὸς ἐξέθρεψ’ ὅδε ,

760 μάτην δ’ ἐμόχθουν καὶ κατεξάνθην πόνοις .

761 νῦν — οὔποτ’ αὖθις — μητέρ’ ἀσπάζου σέθεν ,

762 πρόσπιτνε τὴν τεκοῦσαν , ἀμφὶ δ’ ὠλένας

763 ἕλισσ’ ἐμοῖς νώτοισι καὶ στόμ’ ἅρμοσον .

764 ὦ βάρβαρ’ ἐξευρόντες Ἕλληνες κακά ,

765 τί τόνδε παῖδα κτείνετ’ οὐδὲν αἴτιον ;

766 ὦ Τυνδάρειον ἔρνος , οὔποτ’ εἶ Διός ,

767 πολλῶν δὲ πατέρων φημί σ’ ἐκπεφυκέναι ,

768 Ἀλάστορος μὲν πρῶτον , εἶτα δὲ Φθόνου ,

769 Φόνου τε Θανάτου θ’ ὅσα τε γῆ τρέφει κακά .

770 οὐ γάρ ποτ’ αὐχῶ Ζῆνά γ’ ἐκφῦσαί σ’ ἐγώ ,

771 πολλοῖσι κῆρα βαρβάροις Ἕλλησί τε .

772 ὄλοιο · καλλίστων γὰρ ὀμμάτων ἄπο

773 αἰσχρῶς τὰ κλεινὰ πεδί’ ἀπώλεσας Φρυγῶν .

774 { ἀλλ’ } ἄγετε φέρετε ῥίπτετ’ , εἰ ῥίπτειν δοκεῖ ·

775 δαίνυσθε τοῦδε σάρκας . ἔκ τε γὰρ θεῶν

776 διολλύμεσθα , παιδί τ’ οὐ δυναίμεθ’ ἂν

777 θάνατον ἀρῆξαι . κρύπτετ’ ἄθλιον δέμας

778 καὶ ῥίπτετ’ ἐς ναῦς · ἐπὶ καλὸν γὰρ ἔρχομαι

779 ὑμέναιον , ἀπολέσασα τοὐμαυτῆς τέκνον .