4.4.31 τί οὖν ἀγανακτεῖς ; οὐδεὶς ἀγὼν δίχα θορύβου γίνεται . πολλοὺς δεῖ προγυμναστὰς εἶναι , πολλοὺς τοὺς ἐπικραυγάζοντας , πολλοὺς ἐπιστάτας , πολλοὺς θεατάς .
4.4.32 — ἀλλʹ ἐγὼ ἤθελον ἐφʹ ἡσυχίας διάγειν . — οἴμωζε τοίνυν καὶ στένε , ὥσπερ ἄξιος εἶ . τίς γὰρ ἄλλη μείζων ταύτης ζημία τῷ ἀπαιδεύτῳ καὶ ἀπειθοῦντι τοῖς θείοις διατάγμασιν ἢ τὸ λυπεῖσθαι , τὸ πενθεῖν , τὸ φθονεῖν , ἁπλῶς τὸ ἀτυχεῖν καὶ δυστυχεῖν ; τούτων οὐ θέλεις ἀπαλλάξαι σεαυτόν ; καὶ πῶς ἀπαλλάξω ;
4.4.33 — οὐ πολλάκις ἤκουσας , ὅτι ὄρεξιν ἆραί σε δεῖ παντελῶς , τὴν ἔκκλισιν ἐπὶ μόνα τρέψαι τὰ προαιρετικά , ἀφεῖναί σε δεῖ πάντα , τὸ σῶμα , τὴν κτῆσιν , τὴν φήμην , τὰ βιβλία , θόρυβον , ἀρχάς , ἀναρχίαν ; ὅπου γὰρ ἂν κλίνῃς , ἐδούλευσας , ὑπετάγης , κωλυτὸς ἐγένου , ἀναγκαστός , ὅλος ἐπʹ ἄλλοις .
4.4.34 ἀλλὰ τὸ Κλεάνθους πρόχειρον ἄγου δέ μʹ , ὦ Ζεῦ , καὶ σύ γʹ ἡ Πεπρωμένη . θέλετʹ εἰς Ῥώμην ; εἰς Ῥώμην . εἰς Γύαρα ; εἰς Γύαρα . εἰς Ἀθήνας ; εἰς Ἀθήνας . εἰς φυλακήν ; εἰς φυλακήν . ἂν ἅπαξ εἴπῃ
4.4.35 ς πότε τις εἰς Ἀθήνας ἀπέλθῃ ; , ἀπώλου . ἀνάγκη γε ταύτην τὴν ὄρεξιν ἀτελῆ μὲν οὖσαν ἀτυχῆ σε ποιεῖν , τελειωθεῖσαν δὲ κενόν , ἐφʹ οἷς οὐ δεῖ ἐπαιρόμενον · πάλιν ἂν ἐμποδισθῇς , δυστυχῆ , περιπίπτοντα οἷς οὐ θέλεις .