Greek Reader — Euripides Iphigenia at Aulis (334

Μενέλαος

334 νοῦς δέ γ’ οὐ βέβαιος ἄδικον κτῆμα κοὐ σαφὲς φίλοις .

335 βούλομαι δέ σ’ ἐξελέγξαι , καὶ σὺ μήτ’ ὀργῆς ὕπο

336 ἀποτρέπου τἀληθὲς οὔτ’ αὖ κατατενῶ λίαν ἐγώ .

337 οἶσθ’ , ὅτ’ ἐσπούδαζες ἄρχειν Δαναΐδαις πρὸς Ἴλιον ,

338 τῷ δοκεῖν μὲν οὐχὶ χρῄζων , τῷ δὲ βούλεσθαι θέλων ,

339 ὡς ταπεινὸς ἦσθα , πάσης δεξιᾶς προσθιγγάνων

340 καὶ θύρας ἔχων ἀκλῄστους τῷ θέλοντι δημοτῶν

341 καὶ διδοὺς πρόσρησιν ἑξῆς πᾶσι — κεἰ μή τις θέλοι —

342 τοῖς τρόποις ζητῶν πρίασθαι τὸ φιλότιμον ἐκ μέσου ;

343 κᾆτ’ , ἐπεὶ κατέσχες ἀρχάς , μεταβαλὼν ἄλλους τρόπους

344 τοῖς φίλοισιν οὐκέτ’ ἦσθα τοῖς πρὶν ὡς πρόσθεν φίλος ,

345 δυσπρόσιτος ἔσω τε κλῄθρων σπάνιος . ἄνδρα δ’ οὐ χρεὼν

346 τὸν ἀγαθὸν πράσσοντα μεγάλα τοὺς τρόπους μεθιστάναι ,

347 ἀλλὰ καὶ βέβαιον εἶναι τότε μάλιστα τοῖς φίλοις ,

348 ἡνίκ’ ὠφελεῖν μάλιστα δυνατός ἐστιν εὐτυχῶν .

349 ταῦτα μέν σε πρῶτ’ ἐπῆλθον , ἵνα σε πρῶθ’ ηὗρον κακόν .

350 ὡς δ’ ἐς Αὖλιν ἦλθες αὖθις χὡ Πανελλήνων στρατός ,

351 οὐδὲν ἦσθ’ , ἀλλ’ ἐξεπλήσσου τῇ τύχῃ τῇ τῶν θεῶν ,

352 οὐρίας πομπῆς σπανίζων · Δαναΐδαι δ’ ἀφιέναι

353 ναῦς διήγγελλον , μάτην δὲ μὴ πονεῖν ἐν Αὐλίδι .

354 ὡς ἄνολβον εἶχες ὄμμα σύγχυσίν τ’ , εἰ μὴ νεῶν

355 χιλίων ἄρχων τὸ Πριάμου πεδίον ἐμπλήσεις δορός .

356 κἀμὲ παρεκάλεις · Τί δράσω ; τίνα δὲ πόρον εὕρω πόθεν ; —

357 ὥστε μὴ στερέντα σ’ ἀρχῆς ἀπολέσαι καλὸν κλέος .

358 κᾆτ’ , ἐπεὶ Κάλχας ἐν ἱεροῖς εἶπε σὴν θῦσαι κόρην

359 Ἀρτέμιδι , καὶ πλοῦν ἔσεσθαι Δαναΐδαις , ἡσθεὶς φρένας

360 ἄσμενος θύσειν ὑπέστης παῖδα · καὶ πέμπεις ἑκών ,

361 οὐ βίᾳ — μὴ τοῦτο λέξῃς — σῇ δάμαρτι , παῖδα σὴν

362 δεῦρ’ ἀποστέλλειν , Ἀχιλλεῖ πρόφασιν ὡς γαμουμένην .

363 κᾆθ’ ὑποστρέψας λέληψαι μεταβαλὼν ἄλλας γραφάς ,

364 ὡς φονεὺς οὐκέτι θυγατρὸς σῆς ἔσῃ . μάλιστά γε .

365 οὗτος αὑτός ἐστιν αἰθὴρ ὃς τάδ’ ἤκουσεν σέθεν .

366 μυρίοι δέ τοι πεπόνθασ’ αὐτό · πρὸς τὰ πράγματα

367 ἐκπονοῦσ’ ἔχοντες , εἶτα δ’ ἐξεχώρησαν κακῶς ,

368 τὰ μὲν ὑπὸ γνώμης πολιτῶν ἀσυνέτου , τὰ δ’ ἐνδίκως

369 ἀδύνατοι γεγῶτες αὐτοὶ διαφυλάξασθαι πόλιν .

370 Ἑλλάδος μάλιστ’ ἔγωγε τῆς ταλαιπώρου στένω ,

371 ἥ , θέλουσα δρᾶν τι κεδνόν , βαρβάρους τοὺς οὐδένας

372 καταγελῶντας ἐξανήσει διὰ σὲ καὶ τὴν σὴν κόρην .

373 μηδέν’ ἀνδρείας ἕκατι προστάτην θείμην χθονός ,

374 μηδ’ ὅπλων ἄρχοντα · νοῦν χρὴ τὸν στρατηλάτην ἔχειν ·

375 πόλεος ὡς ἄρχων ἀνὴρ πᾶς , ξύνεσιν ἢν ἔχων τύχῃ .