Greek Reader — Euripides Iphigenia at Aulis (473–503)

Euripides Iphigenia at Aulis 473–503

Μενέλαος

473 Πέλοπα κατόμνυμ’ , ὃς πατὴρ τοὐμοῦ πατρὸς

474 τοῦ σοῦ τ’ ἐκλήθη , τὸν τεκόντα τ’ Ἀτρέα ,

475 ἦ μὴν ἐρεῖν σοι τἀπὸ καρδίας σαφῶς

476 καὶ μὴ ’πίτηδες μηδέν , ἀλλ’ ὅσον φρονῶ .

477 ἐγώ σ’ ἀπ’ ὄσσων ἐκβαλόντ’ ἰδὼν δάκρυ

478 ᾤκτιρα , καὐτὸς ἀνταφῆκά σοι πάλιν

479 καὶ τῶν παλαιῶν ἐξαφίσταμαι λόγων ,

480 οὐκ ἐς σὲ δεινός · εἰμὶ δ’ οὗπερ εἶ σὺ νῦν ·

481 καί σοι παραινῶ μήτ’ ἀποκτείνειν τέκνον

482 μήτ’ ἀνθελέσθαι τοὐμόν . οὐ γὰρ ἔνδικον

483 σὲ μὲν στενάζειν , τἀμὰ δ’ ἡδέως ἔχειν ,

484 θνῄσκειν τε τοὺς σούς , τοὺς δ’ ἐμοὺς ὁρᾶν φάος .

485 τί βούλομαι γάρ ; οὐ γάμους ἐξαιρέτους

486 ἄλλους λάβοιμ’ ἄν , εἰ γάμων ἱμείρομαι ;

487 ἀλλ’ ἀπολέσας ἀδελφόν , ὅν μ’ ἥκιστα χρῆν ,

488 Ἑλένην ἕλωμαι , τὸ κακὸν ἀντὶ τἀγαθοῦ ;

489 ἄφρων νέος τ’ ἦ , πρὶν τὰ πράγματ’ ἐγγύθεν

490 σκοπῶν ἐσεῖδον οἷον ἦν κτείνειν τέκνα .

491 ἄλλως τέ μ’ ἔλεος τῆς ταλαιπώρου κόρης

492 ἐσῆλθε , συγγένειαν ἐννοουμένῳ ,

493 ἣ τῶν ἐμῶν ἕκατι θύεσθαι γάμων

494 μέλλει . τί δ’ Ἑλένης παρθένῳ τῇ σῇ μέτα ;

495 ἴτω στρατεία διαλυθεῖσ’ ἐξ Αὐλίδος ,

496 σὺ δ’ ὄμμα παῦσαι δακρύοις τέγγων τὸ σόν ,

497 ἀδελφέ , κἀμὲ παρακαλῶν ἐς δάκρυα .

498 εἰ δέ τι κόρης σῆς θεσφάτων μέτεστι σοί ,

499 μὴ ’μοὶ μετέστω · σοὶ νέμω τοὐμὸν μέρος .

500 ἀλλ’ ἐς μεταβολὰς ἦλθον ἀπὸ δεινῶν λόγων ;

501 εἰκὸς πέπονθα · τὸν ὁμόθεν πεφυκότα

502 στέργων μετέπεσον . ἀνδρὸς οὐ κακοῦ τροπαὶ

503 τοιαίδε , χρῆσθαι τοῖσι βελτίστοις ἀεί .