Greek Reader — Euripides Cyclops (382

Ὀδυσσεύς

382 ἐπεὶ πετραίαν τήνδ’ { ἐσήλθομεν χθόνα , }

383 ἀνέκαυσε μὲν πῦρ πρῶτον , ὑψηλῆς δρυὸς

384 κορμοὺς πλατείας ἐσχάρας βαλὼν ἔπι ,

385 τρισσῶν ἁμαξῶν ὡς ἀγώγιμον βάρος .

386 ἔπειτα φύλλων ἐλατίνων χαμαιπετῆ

387 ἔστρωσεν εὐνὴν πλησίον πυρὸς φλογί .

388 κρατῆρα δ’ ἐξέπλησεν ὡς δεκάμφορον ,

389 μόσχους ἀμέλξας , λευκὸν ἐσχέας γάλα .

390 σκύφος τε κισσοῦ παρέθετ’ εἰς εὖρος τριῶν

391 πήχεων , βάθος δὲ τεσσάρων ἐφαίνετο .

392 καὶ χάλκεον λέβητ’ ἐπέζεσεν πυρί ,

393 ὀβελούς τ’ , ἄκρους μὲν ἐγκεκαυμένους πυρί ,

394 ξεστοὺς δὲ δρεπάνῳ τἄλλα , παλιούρου κλάδων ,

395 { Αἰτναῖά τε σφαγεῖα πελέκεων γνάθοις . }

396 ὡς δ’ ἦν ἕτοιμα πάντα τῷ θεοστυγεῖ

397 Ἅιδου μαγείρῳ , φῶτε συμμάρψας δύο

398 ἔσφαζ’ ἑταίρων τῶν ἐμῶν , ῥυθμῷ θ’ ἐνὶ

399 τὸν μὲν λέβητος ἐς κύτος χαλκήλατον ,

400 τὸν δ’ αὖ , τένοντος ἁρπάσας ἄκρου ποδός ,

401 παίων πρὸς ὀξὺν στόνυχα πετραίου λίθου ,

402 ἐγκέφαλον ἐξέρρανε , καὶ { καθαρπάσας }

403 λάβρῳ μαχαίρᾳ σάρκας ἐξώπτα πυρί

404 τὰ δ’ ἐς λέβητ’ ἐφῆκεν ἕψεσθαι μέλη

405 ἐγὼ δ’ ὁ τλήμων δάκρυ’ ἀπ’ ὀφθαλμῶν χέων

406 ἐχριμπτόμην Κύκλωπι κἀδιακόνουν ·

407 ἅλλοι δ’ ὅπως ὄρνιθες ἐν μυχοῖς πέτρας

408 πτήξαντες εἶχον , αἷμα δ’ οὐκ ἐνῆν χροΐ .

409 ἐπεὶ δ’ ἑταίρων τῶν ἐμῶν πλησθεὶς βορᾶς

410 ἀνέπεσε , φάρυγος αἰθέρ’ ἐξιεὶς βαρύν ,

411 ἐσῆλθέ μοί τι θεῖον · ἐμπλήσας σκύφος

412 Μάρωνος αὐτῷ τοῦδε προσφέρω πιεῖν ,

413 λέγων τάδ’ · Ὦ τοῦ ποντίου θεοῦ Κύκλωψ ,

414 σκέψαι τόδ’ οἷον Ἑλλὰς ἀμπέλων ἄπο

415 θεῖον κομίζει πῶμα , Διονύσου γάνος .

416 ὃ δ’ ἔκπλεως ὢν τῆς ἀναισχύντου βορᾶς

417 ἐδέξατ’ ἔσπασέν { τ’ } ἄμυστιν ἑλκύσας

418 κἀπῄνεσ’ ἄρας χεῖρα · Φίλτατε ξένων ,

419 καλὸν τὸ πῶμα δαιτὶ πρὸς καλῇ δίδως .

420 ἡσθέντα δ’ αὐτὸν ὡς ἐπῃσθόμην ἐγώ ,

421 ἄλλην ἔδωκα κύλικα , γιγνώσκων ὅτι

422 τρώσει νιν οἷνος καὶ δίκην δώσει τάχα .

423 καὶ δὴ πρὸς ᾠδὰς εἷρπ’ . ἐγὼ δ’ ἐπεγχέων

424 ἄλλην ἐπ’ ἄλλῃ σπλάγχν’ ἐθέρμαινον ποτῷ .

425 ᾄδεῖ δὲ παρὰ κλαίουσι συνναύταις ἐμοῖς

426 ἄμουσ’ , ἐπηχεῖ δ’ ἄντρον . ἐξελθὼν δ’ ἐγὼ

427 σιγῇ . σὲ σῶσαι κἄμ’ , ἐὰν βούλῃ , θέλω .

428 ἀλλ’ εἴπατ’ εἴτε χρῄζετ’ εἴτ’ οὐ χρῄζετε

429 φεύγειν ἄμεικτον ἄνδρα καὶ τὰ Βακχίου

430 ναίειν μέλαθρα Δαναΐδων νυμφῶν μέτα .

431 ὁ μὲν γὰρ ἔνδον σὸς πατὴρ τάδ’ ᾔνεσεν .

432 ἀλλ’ ἀσθενὴς γὰρ κἀποκερδαίνων ποτοῦ ,

433 ὥσπερ πρὸς ἰξῷ τῇ κύλικι λελημμένος

434 πτέρυγας ἀλύει · σὺ δέ — νεανίας γὰρ εἶ —

435 σώθητι μετ’ ἐμοῦ καὶ τὸν ἀρχαῖον φίλον

436 Διόνυσον ἀνάλαβ’ , οὐ Κύκλωπι προσφερῆ .

Morphology & Lexicon ( hover to peek ✧ click to lock )

Morphology & Lexicon
( hover to peek ✧ click to lock )