Greek Reader — Euripides Helen (822–841)

Euripides Helen 822–841

Μενελέως

822 χρηστήριον μὲν τοὔνομ’ · ὅ τι δὲ δρᾷ φράσον .

Ἑλένη

823 πάντ’ οἶδ’ , ἐρεῖ τε συγγόνῳ παρόντα σε .

Μενελέως

824 θνῄσκοιμεν ἄν · λαθεῖν γὰρ οὐχ οἷόν τέ μοι .

Ἑλένη

825 ἴσως ἂν ἀναπείσαιμεν ἱκετεύοντέ νιν —

Μενελέως

826 τί χρῆμα δρᾶσαι ; τίν’ ὑπάγεις μ’ ἐς ἐλπίδα ;

Ἑλένη

827 παρόντα γαίᾳ μὴ φράσαι σε συγγόνῳ .

Μενελέως

828 πείσαντε δ’ ἐκ γῆς διορίσαιμεν ἂν πόδα ;

Ἑλένη

829 κοινῇ γ’ ἐκείνῃ ῥᾳδίως , λάθρᾳ δ’ ἂν οὔ .

Μενελέως

830 σὸν ἔργον , ὡς γυναικὶ πρόσφορον γυνή .

Ἑλένη

831 ὡς οὐκ ἄχρωστα γόνατ’ ἐμῶν ἕξει χερῶν .

Μενελέως

832 φέρ’ , ἢν δὲ δὴ νῷν μὴ ἀποδέξηται λόγους ;

Ἑλένη

833 θανῇ · γαμοῦμαι δ’ ἡ τάλαιν’ ἐγὼ βίᾳ .

Μενελέως

834 προδότις ἂν εἴης · τὴν βίαν σκήψασ’ ἔχεις .

Ἑλένη

835 ἀλλ’ ἁγνὸν ὅρκον σὸν κάρα κατώμοσα [ ... ]

Μενελέως

836 τί φῄς ; θανεῖσθαι ; κοὔποτ’ ἀλλάξεις λέχη ;

Ἑλένη

837 ταὐτῷ ξίφει γε · κείσομαι δὲ σοῦ πέλας .

Μενελέως

838 ἐπὶ τοῖσδε τοίνυν δεξιᾶς ἐμῆς θίγε .

Ἑλένη

839 ψαύω , θανόντος σοῦ τόδ’ ἐκλείψειν φάος .

Μενελέως

840 κἀγὼ στερηθεὶς σοῦ τελευτήσειν βίον .

Ἑλένη

841 πῶς οὖν θανούμεθ’ ὥστε καὶ δόξαν λαβεῖν ;