Χορός
267 δράσω τάδ’ · ἐνδίκως γὰρ ἐκτείσῃ πόσιν ,
268 Μήδεια . πενθεῖν δ’ οὔ σε θαυμάζω τύχας .
269 ὁρῶ δὲ καὶ Κρέοντα , τῆσδ’ ἄνακτα γῆς ,
270 στείχοντα , καινῶν ἄγγελον βουλευμάτων .
Κρέων
271 σὲ τὴν σκυθρωπὸν καὶ πόσει θυμουμένην ,
272 Μήδειαν , εἶπον τῆσδε γῆς ἔξω περᾶν
273 φυγάδα , λαβοῦσαν δισσὰ σὺν σαυτῇ τέκνα ·
274 καὶ μή τι μέλλειν · ὡς ἐγὼ βραβεὺς λόγου
275 τοῦδ’ εἰμί , κοὐκ ἄπειμι πρὸς δόμους πάλιν ,
276 πρὶν ἄν σε γαίας τερμόνων ἔξω βάλω .
Μήδεια
277 αἰαῖ · πανώλης ἡ τάλαιν’ ἀπόλλυμαι .
278 ἐχθροὶ γὰρ ἐξιᾶσι πάντα δὴ κάλων ,
279 κοὐκ ἔστιν ἄτης εὐπρόσοιστος ἔκβασις .
280 ἐρήσομαι δὲ καὶ κακῶς πάσχουσ’ ὅμως ·
281 τίνος μ’ ἕκατι γῆς ἀποστέλλεις , Κρέον ;