Greek Reader — Euripides The Trojan Women (424

Κασάνδρα

424 ἦ δεινὸς ὁ λάτρις . τί ποτ’ ἔχουσι τοὔνομα

425 κήρυκες , ἓν ἀπέχθημα πάγκοινον βροτοῖς ,

426 οἱ περὶ τυράννους καὶ πόλεις ὑπηρέται ;

427 σὺ τὴν ἐμὴν φῂς μητέρ’ εἰς Ὀδυσσέως

428 ἥξειν μέλαθρα ; ποῦ δ’ Ἀπόλλωνος λόγοι ,

429 οἵ φασιν αὐτὴν εἰς ἔμ’ ἡρμηνευμένοι

430 αὐτοῦ θανεῖσθαι ; [ ... ] τἄλλα δ’ οὐκ ὀνειδιῶ .

431 δύστηνος , οὐκ οἶδ’ οἷά νιν μένει παθεῖν ·

432 ὡς χρυσὸς αὐτῷ τἀμὰ καὶ Φρυγῶν κακὰ

433 δόξει ποτ’ εἶναι . δέκα γὰρ ἐκπλήσας ἔτη

434 πρὸς τοῖσιν ἐνθάδ’ , ἵξεται μόνος πάτραν

[ ... ]

435 οὗ δὴ στενὸν δίαυλον ᾤκισται πέτρας

436 δεινὴ Χάρυβδις , ὠμοβρώς τ’ ὀρειβάτης

437 Κύκλωψ , Λιγυστίς θ’ ἡ συῶν μορφώτρια

438 Κίρκη , θαλάσσης θ’ ἁλμυρᾶς ναυάγια ,

439 λωτοῦ τ’ ἔρωτες , Ἡλίου θ’ ἁγναὶ βόες ,

440 αἳ σάρκα φωνήεσσαν ἥσουσίν ποτε ,

441 πικρὰν Ὀδυσσεῖ γῆρυν . ὡς δὲ συντέμω ,

442 ζῶν εἶσ’ ἐς Ἅιδου κἀκφυγὼν λίμνης ὕδωρ

443 κάκ’ ἐν δόμοισι μυρί’ εὑρήσει μολών . [ ... ]

444 ἀλλὰ γὰρ τί τοὺς Ὀδυσσέως ἐξακοντίζω πόνους ;

445 στεῖχ’ ὅπως τάχιστ’ · ἐς Ἅιδου νυμφίῳ γημώμεθα .

446 ἦ κακὸς κακῶς ταφήσῃ νυκτός , οὐκ ἐν ἡμέρᾳ ,

447 ὦ δοκῶν σεμνόν τι πράσσειν , Δαναϊδῶν ἀρχηγέτα .

448 κἀμέ τοι νεκρὸν φάραγγες γυμνάδ’ ἐκβεβλημένην

449 ὕδατι χειμάρρῳ ῥέουσαι , νυμφίου πέλας τάφου ,

450 θηρσὶ δώσουσιν δάσασθαι , τὴν Ἀπόλλωνος λάτριν .

451 ὦ στέφη τοῦ φιλτάτου μοι θεῶν , ἀγάλματ’ εὔια ,

452 χαίρετ’ · ἐκλέλοιφ’ ἑορτάς , αἷς πάροιθ’ ἠγαλλόμην .

453 ἴτ’ ἀπ’ ἐμοῦ χρωτὸς σπαραγμοῖς , ὡς ἔτ’ οὖσ’ ἁγνὴ χρόα

454 δῶ θοαῖς αὔραις φέρεσθαί σοι τάδ’ , ὦ μαντεῖ’ ἄναξ .

455 ποῦ σκάφος τὸ τοῦ στρατηγοῦ ; ποῖ ποτ’ ἐμβαίνειν με χρή ;

456 οὐκέτ’ ἂν φθάνοις ἂν αὔραν ἱστίοις καραδοκῶν ,

457 ὡς μίαν τριῶν Ἐρινὺν τῆσδέ μ’ ἐξάξων χθονός .

458 χαῖρέ μοι , μῆτερ · δακρύσῃς μηδέν · ὦ φίλη πατρίς ,

459 οἵ τε γῆς ἔνερθ’ ἀδελφοὶ χὡ τεκὼν ἡμᾶς πατήρ ,

460 οὐ μακρὰν δέξεσθέ μ’ · ἥξω δ’ ἐς νεκροὺς νικηφόρος

461 καὶ δόμους πέρσασ’ Ἀτρειδῶν , ὧν ἀπωλόμεσθ’ ὕπο . [ ... ]