Greek Reader — The New Testament, The Gospel According to Luke (1.39

1.39 Ἀναστᾶσα δὲ Μαριὰμ ἐν ταῖς ἡμέραις ταύταις ἐπορεύθη εἰς τὴν ὀρεινὴν μετὰ σπουδῆς εἰς πόλιν Ἰούδα ,

1.40 καὶ εἰσῆλθεν εἰς τὸν οἶκον Ζαχαρίου καὶ ἠσπάσατο τὴν Ἐλισάβετ .

1.41 καὶ ἐγένετο ὡς ἤκουσεν ʹτὸν ἀσπασμὸν τῆς Μαρίας ἡ Ἐλισάβετʹ , ἐσκίρτησεν τὸ βρέφος ἐν τῇ κοιλίᾳ αὐτῆς , καὶ ἐπλήσθη πνεύματος ἁγίου ἡ Ἐλισάβετ ,

1.42 καὶ ἀνεφώνησεν κραυγῇ μεγάλῃ καὶ εἶπεν · Εὐλογημένη σὺ ἐν γυναιξίν , καὶ εὐλογημένος ὁ καρπὸς τῆς κοιλίας σου .

1.43 καὶ πόθεν μοι τοῦτο ἵνα ἔλθῃ ἡ μήτηρ τοῦ κυρίου μου πρὸς ἐμέ ;

1.44 ἰδοὺ γὰρ ὡς ἐγένετο ἡ φωνὴ τοῦ ἀσπασμοῦ σου εἰς τὰ ὦτά μου , ἐσκίρτησεν ʹἐν ἀγαλλιάσει τὸ βρέφοσʹ ἐν τῇ κοιλίᾳ μου .

1.45 καὶ μακαρία ἡ πιστεύσασα ὅτι ἔσται τελείωσις τοῖς λελαλημένοις αὐτῇ παρὰ κυρίου .

1.46 Καὶ εἶπεν Μαριάμ · Μεγαλύνει ἡ ψυχή μου τὸν κύριον ,

1.47 καὶ ἠγαλλίασεν τὸ πνεῦμά μου ἐπὶ τῷ θεῷ τῷ σωτῆρί μου ·

1.48 ὅτι ἐπέβλεψεν ἐπὶ τὴν ταπείνωσιν τῆς δούλης αὐτοῦ , ἰδοὺ γὰρ ἀπὸ τοῦ νῦν μακαριοῦσίν με πᾶσαι αἱ γενεαί ·

1.49 ὅτι ἐποίησέν μοι μεγάλα ὁ δυνατός , καὶ ἅγιον τὸ ὄνομα αὐτοῦ ,

1.50 καὶ τὸ ἔλεος αὐτοῦ εἰς γενεὰς ʹκαὶ γενεὰσʹ τοῖς φοβουμένοις αὐτόν .

1.51 Ἐποίησεν κράτος ἐν βραχίονι αὐτοῦ , διεσκόρπισεν ὑπερηφάνους διανοίᾳ καρδίας αὐτῶν ·

1.52 καθεῖλεν δυνάστας ἀπὸ θρόνων καὶ ὕψωσεν ταπεινούς ,

1.53 πεινῶντας ἐνέπλησεν ἀγαθῶν καὶ πλουτοῦντας ἐξαπέστειλεν κενούς .

1.54 ἀντελάβετο Ἰσραὴλ παιδὸς αὐτοῦ , μνησθῆναι ἐλέους ,

1.55 καθὼς ἐλάλησεν πρὸς τοὺς πατέρας ἡμῶν , τῷ Ἀβραὰμ καὶ τῷ σπέρματι αὐτοῦ εἰς τὸν αἰῶνα .