1.12.19 τί οὖν ἀπολείπεται ἢ τίς εὑρίσκεται μηχανὴ πρὸς τὴν χρῆσιν αὐτῶν ; τοιαύτη , διʹ ἧς ἐκεῖνοι μὲν ποιήσουσι τὰ φαινόμενα αὐτοῖς , ἡμεῖς δʹ οὐδὲν ἧττον κατὰ φύσιν ἕξομεν .
1.12.20 σὺ δʹ ἀταλαίπωρος εἶ καὶ δυσάρεστος κἂν μὲν μόνος ᾖς , ἐρημίαν καλεῖς τοῦτο , ἂν δὲ μετὰ ἀνθρώπων , ἐπιβούλους λέγεις καὶ λῃστάς , μέμφῃ δὲ καὶ γονεῖς τοὺς σεαυτοῦ καὶ τέκνα καὶ ἀδελφοὺς καὶ γείτονας .
1.12.21 ἔδει δὲ μόνον μένοντα ἡσυχίαν καλεῖν αὐτὸ καὶ ἐλευθερίαν καὶ ὅμοιον τοῖς θεοῖς ἡγεῖσθαι αὑτόν , μετὰ πολλῶν δʹ ὄντα μὴ ὄχλον καλεῖν μηδὲ θόρυβον μηδʹ ἀηδίαν , ἀλλʹ ἑορτὴν καὶ πανήγυριν καὶ οὕτως πάντα εὐαρέστως δέχεσθαι . τίς οὖν ἡ κόλασις τοῖς οὐ προσδεχομένοις ;
1.12.22 τὸ οὕτως ἔχειν ὡς ἔχουσιν . δυσαρεστεῖ τις τῷ μόνος εἶναι ; ἔστω ἐν ἐρημίᾳ . δυσαρεστεῖ τις τοῖς γονεῦσιν ; ἔστω κακὸς υἱὸς καὶ πενθείτω . δυσαρεστεῖ τοῖς τέκνοις ;
1.12.23 ἔστω κακὸς πατήρ . βάλε αὐτὸν εἰς φυλακήν . ποίαν φυλακήν ; ὅπου νῦν ἐστιν . ἄκων γάρ ἐστιν · ὅπου δέ τις ἄκων ἐστίν , ἐκεῖνο φυλακὴ αὐτῷ ἐστιν . καθὸ καὶ Σωκράτης οὐκ ἦν ἐν φυλακῇ , ἑκὼν γὰρ ἦν .
1.12.24 σκέλος οὖν μοι γενέσθαι πεπηρωμένον . ἀνδράποδον , εἶτα διʹ ἓν σκελύδριον τῷ κόσμῳ ἐγκαλεῖς ; οὐκ ἐπιδώσεις αὐτὸ τοῖς ὅλοις ; οὐκ ἀποστήσῃ ; οὐ χαίρων παραχωρήσεις τῷ δεδωκότι ;
1.12.25 ἀγανακτήσεις δὲ καὶ δυσαρεστήσεις τοῖς ὑπὸ τοῦ Διὸς διατεταγμένοις , ἃ ἐκεῖνος μετὰ τῶν Μοιρῶν παρουσῶν καὶ ἐπικλωθουσῶν σου τὴν γένεσιν ὥρισεν καὶ διέταξεν ;