1.12.35 τί οὖν ἐπισπᾷς σεαυτῷ ταῦτα ὧν ἀνυπεύθυνος εἶ ; τοῦτό ἐστιν ἑαυτῷ παρέχειν πράγματα .
1.13.head πῶς ἕκαστα ἔστιν ποιεῖν ἀρεστῶς θεοῖς .
1.13.1 πυθομένου δέ τινος , πῶς ἔστιν ἐσθίειν ἀρεστῶς θεοῖς , Εἰ δικαίως ἔστιν , ἔφη , καὶ εὐγνωμόνως καὶ ἴσως ἐγκρατῶς καὶ κοσμίως , οὐκ ἔστι καὶ ἀρεστῶς τοῖς θεοῖς ;
1.13.2 ὅταν δὲ θερμὸν αἰτήσαντός σου μὴ ὑπακούσῃ ὁ παῖς ἢ ὑπακούσας χλιαρώτερον ἐνέγκῃ ἢ μηδʹ εὑρεθῇ ἐν τῇ οἰκίᾳ , τὸ μὴ χαλεπαίνειν μηδὲ ῥήγνυσθαι οὐκ ἔστιν ἀρεστὸν τοῖς θεοῖς ;
1.13.3 — πῶς οὖν τις ἀνάσχηται τῶν τοιούτων ; — ἀνδράποδον , οὐκ ἀνέξῃ τοῦ ἀδελφοῦ τοῦ σαυτοῦ , ὃς ἔχει τὸν Δία πρόγονον , ὥσπερ υἱὸς ἐκ τῶν αὐτῶν σπερμάτων γέγονεν καὶ τῆς αὐτῆς ἄνωθεν καταβολῆς ,
1.13.4 ἀλλʹ εἰ ἔν τινι τοιαύτῃ χώρᾳ κατετάγης ὑπερεχούσῃ , εὐθὺς τύραννον καταστήσεις σεαυτόν ; οὐ μεμνήσῃ τί εἶ καὶ τίνων ἄρχεις ; ὅτι συγγενῶν , ὅτι ἀδελφῶν φύσει , ὅτι τοῦ Διὸς ἀπογόνων ;
1.13.5 — ἀλλʹ ὠνὴν αὐτῶν ἔχω , ἐκεῖνοι δʹ ἐμοῦ οὐκ ἔχουσιν . — ὁρᾷς ποῦ βλέπεις ; ὅτι εἰς τὴν γῆν , ὅτι εἰς τὸ βάραθρον , ὅτι εἰς τοὺς ταλαιπώρους τούτους νόμους τοὺς τῶν νεκρῶν , εἰς δὲ τοὺς τῶν θεῶν οὐ βλέπεις ;
1.14.head ὅτι πάντας ἐφορᾷ τὸ θεῖον .
1.14.1 πυθομένου δέ τινος , πῶς ἄν τις πεισθείη , ὅτι ἕκαστον τῶν ὑπʹ αὐτοῦ πραττομένων ἐφορᾶται ὑπὸ τοῦ θεοῦ , Οὐ δοκεῖ σοι , ἔφη , ἡνῶσθαι τὰ πάντα ;