1.15.8 εἶτα συκῆς μὲν καρπὸς ἄφνω καὶ μιᾷ ὥρᾳ οὐ τελειοῦται , γνώμης δʹ ἀνθρώπου καρπὸν θέλεις οὕτως διʹ ὀλίγου καὶ εὐκόλως κτήσασθαι ; μηδʹ ἂν ἐγώ σοι λέγω , προσδόκα .
1.16.head περὶ προνοίας .
1.16.1 μὴ θαυμάζετʹ εἰ τοῖς μὲν ἄλλοις ζῴοις τὰ πρὸς τὸ σῶμα ἕτοιμα γέγονεν , οὐ μόνον τροφαὶ καὶ πόμα , ἀλλὰ καὶ κοίτη καὶ τὸ μὴ δεῖσθαι ὑποδημάτων , μὴ ὑποστρωμάτων , μὴ ἐσθῆτος , ἡμεῖς δὲ πάντων τούτων προσδεόμεθα .
1.16.2 τὰ γὰρ οὐκ αὐτῶν ἕνεκα , ἀλλὰ πρὸς ὑπηρεσίαν γεγονότα οὐκ ἐλυσιτέλει προσδεόμενα ἄλλων πεποιηκέναι .
1.16.3 ἐπεὶ ὅρα οἷον ἦν ἡμᾶς φροντίζειν μὴ περὶ αὑτῶν μόνον ἀλλὰ καὶ περὶ τῶν προβάτων καὶ τῶν ὄνων , πῶς ἐνδύσηται καὶ πῶς ὑποδήσηται , πῶς φάγῃ , πῶς πίῃ .
1.16.4 ἀλλʹ ὥσπερ οἱ στρατιῶται ἕτοιμοί εἰσι τῷ στρατηγῷ ὑποδεδεμένοι ἐνδεδυμένοι ὡπλισμένοι , εἰ δʹ ἔδει περιερχόμενον τὸν χιλίαρχον ὑποδεῖν ἢ ἐνδύειν τοὺς χιλίους , δεινὸν ἂν ἦν , οὕτω καὶ ἡ φύσις πεποίηκε τὰ πρὸς ὑπηρεσίαν γεγονότα ἕτοιμα παρεσκευασμένα μηδεμιᾶς ἐπιμελείας ἔτι προσδεόμενα .
1.16.5 οὕτως ἓν παιδίον μικρὸν καὶ ῥάβδῳ ἐλαύνει τὰ πρόβατα .
1.16.6 νῦν δʹ ἡμεῖς ἀφέντες ἐπὶ τούτοις εὐχαριστεῖν , ὅτι μὴ καὶ αὐτῶν τὴν ἴσην ἐπιμέλειαν ἐπιμελούμεθα , ἐφʹ αὑτοῖς ἐγκαλοῦμεν τῷ θεῷ .
1.16.7 καίτοι νὴ τὸν Δία καὶ τοὺς θεοὺς ἓν τῶν γεγονότων ἀπήρκει πρὸς τὸ αἰσθέσθαι τῆς προνοίας τῷ γε αἰδήμονι καὶ εὐχαρίστῳ .