1.17.12 Ἀντισθένης δʹ οὐ λέγει ; καὶ τίς ἐστιν ὁ γεγραφὼς ὅτι ἀρχὴ παιδεύσεως ἡ τῶν ὀνομάτων ἐπίσκεψις ; Σωκράτης δʹ οὐ λέγει ; καὶ περὶ τίνος γράφει Ξενοφῶν , ὅτι ἤρχετο ἀπὸ τῆς τῶν ὀνομάτων ἐπισκέψεως , τί σημαίνει ἕκαστον ;
1.17.13 ἆρʹ οὖν τοῦτό ἐστι τὸ μέγα καὶ τὸ θαυμαστὸν νοῆσαι Χρύσιππον ἢ ἐξηγήσασθαι ; καὶ τίς λέγει τοῦτο ; τί οὖν τὸ θαυμαστόν ἐστιν ;
1.17.14 νοῆσαι τὸ βούλημα τῆς φύσεως . τί οὖν ; αὐτὸς διὰ σεαυτοῦ παρακολουθεῖς ; καὶ τίνος ἔτι χρείαν ἔχεις ; εἰ γὰρ ἀληθές ἐστι τὸ πάντας ἄκοντας ἁμαρτάνειν , σὺ δὲ καταμεμάθηκας τὴν ἀλήθειαν , ἀνάγκη σε ἤδη κατορθοῦν .
1.17.15 ἀλλὰ νὴ Δία οὐ παρακολουθῶ τῷ βουλήματι τῆς φύσεως . τίς οὖν ἐξηγεῖται αὐτό ; λέγουσιν ὅτι Χρύσιππος .
1.17.16 ἔρχομαι καὶ ἐπιζητῶ τί λέγει οὗτος ὁ ἐξηγητὴς τῆς φύσεως . ἄρχομαι μὴ νοεῖν τί λέγει , ζητῶ τὸν ἐξηγούμενον . ἴδε ἐπίσκεψαι , πῶς τοῦτο λέγεται , καθάπερ εἰ Ῥωμαϊστί .
1.17.17 ποία οὖν ἐνθάδʹ ὀφρὺς τοῦ ἐξηγουμένου ; οὐδʹ αὐτοῦ Χρυσίππου δικαίως , εἰ μόνον ἐξηγεῖται τὸ βούλημα τῆς φύσεως , αὐτὸς δʹ οὐκ ἀκολουθεῖ · πόσῳ πλέον τοῦ ἐκεῖνον ἐξηγουμένου ;
1.17.18 οὐδὲ γὰρ Χρυσίππου χρείαν ἔχομεν διʹ αὐτόν , ἀλλʹ ἵνα παρακολουθήσωμεν τῇ φύσει . οὐδὲ γὰρ τοῦ θύτου διʹ αὐτόν , ἀλλʹ ὅτι διʹ ἐκείνου κατανοήσειν οἰόμεθα τὰ μέλλοντα καὶ σημαινόμενα ὑπὸ τῶν θεῶν , οὐδὲ τῶν σπλάγχνων διʹ αὐτά ,
1.17.19 ἀλλʹ ὅτι διʹ ἐκείνων σημαίνεται , οὐδὲ τὸν κόρακα θαυμάζομεν ἢ τὴν κορώνην , ἀλλὰ τὸν θεὸν σημαίνοντα διὰ τούτων .