1.18.21 τίς οὖν ὁ ἀήττητος ; ὃν οὐκ ἐξίστησιν οὐδὲν τῶν ἀπροαιρέτων . εἶτα λοιπὸν ἑκάστην τῶν περιστάσεων ἐπερχόμενος καταμανθάνω ὡς ἐπὶ τοῦ ἀθλητοῦ . οὗτος ἐξεβίασε τὸν πρῶτον κλῆρον . τί οὖν τὸν δεύτερον ; τί δʹ ἂν καῦμα ᾖ ;
1.18.22 τί δʹ ἐν Ὀλυμπίᾳ ; καὶ ἐνταῦθα ὡσαύτως . ἂν ἀργυρίδιον προβάλῃς , καταφρονήσει . τί οὖν ἂν κορασίδιον ; τί οὖν ἂν ἐν σκότῳ ; τί οὖν ἂν δοξάριον ; τί οὖν ἂν λοιδορίαν ; τί οὖν ἂν ἔπαινον ; τί δʹ ἂν θάνατον ;
1.18.23 δύναται ταῦτα πάντα νικῆσαι . τί οὖν ἂν καῦμα ᾖ , τοῦτό ἐστι · τί , ἂν οἰνωμένος ᾖ ; τί ἂν μελαγχολῶν ; τί ἐν ὕπνοις ; οὗτός μοί ἐστιν ὁ ἀνίκητος ἀθλητής .
1.19.head πῶς ἔχειν δεῖ πρὸς τοὺς τυράννους .
1.19.1 ὅτι ἄν τινι προσῇ τι πλεονέκτημα ἢ δοκῇ γε προσεῖναι μὴ προσόν , τοῦτον πᾶσα ἀνάγκη , ἐὰν ἀπαίδευτος ᾖ , πεφυσῆσθαι διʹ αὐτό .
1.19.2 εὐθὺς ὁ τύραννος λέγει ἐγώ εἰμι ὁ πάντων κράτιστος . καὶ τί μοι δύνασαι παρασχεῖν ; ὄρεξίν μοι δύνασαι περιποιῆσαι ἀκώλυτον ; πόθεν σοι ; σὺ γὰρ ἔχεις ; ἔκκλισιν ἀπερίπτωτον ; σὺ γὰρ ἔχεις ; ὁρμὴν ἀναμάρτητον ;
1.19.3 καὶ ποῦ σοι μέτεστιν ; ἄγε , ἐν νηὶ δὲ σαυτῷ θαρρεῖς ἢ τῷ εἰδότι ; ἐπὶ δʹ ἅρματος τίνι ἢ τῷ εἰδότι ;