1.24.16 οἱ δὲ βασιλεῖς ἄρχονται μὲν ἀπʹ ἀγαθῶν · στέψατε δώματα · εἶτα περὶ τρίτον ἢ τέταρτον μέρος · ἰὼ Κιθαιρών , τί μʹ ἐδέχου ; ἀνδράποδον , ποῦ οἱ στέφανοι , ποῦ τὸ διάδημα ;
1.24.17 οὐδέν σε ὠφελοῦσιν οἱ δορυφόροι ;
1.24.18 ὅταν οὖν ἐκείνων τινὶ προσίῃς , τούτων μέμνησο , ὅτι τραγῳδῷ προσέρχῃ , οὐ τῷ ὑποκριτῇ , ἀλλʹ αὐτῷ τῷ Οἰδίποδι .
1.24.19 ἀλλὰ μακάριος ὁ δεῖνα · μετὰ πολλῶν γὰρ περιπατεῖ . κἀγὼ συγκατατάττω ἐμαυτὸν σὺν τοῖς πολλοῖς καὶ μετὰ πολλῶν περιπατῶ .
1.24.20 τὸ δὲ κεφάλαιον · μέμνησο ὅτι ἡ θύρα ἤνοικται . μὴ γίνου τῶν παιδίων δειλότερος , ἀλλʹ ὡς ἐκεῖνα , ὅταν αὐτοῖς μὴ ἀρέσκῃ τὸ πρᾶγμα , λέγει οὐκέτι παίξω , καὶ σύ , ὅταν σοι φαίνηταί τινα εἶναι τοιαῦτα , εἰπὼν οὐκέτι παίξω ἀπαλλάσσου , μένων δὲ μὴ θρήνει .
1.25.head πρὸς τὸ αὐτό .
1.25.1 εἰ ταῦτα ἀληθῆ ἐστι καὶ μὴ βλακεύομεν μηδʹ ὑποκρινόμεθα ὅτι τὸ ἀγαθὸν τοῦ ἀνθρώπου ἐν προαιρέσει καὶ τὸ κακόν , τὰ δʹ ἄλλα πάντα οὐδὲν πρὸς ἡμᾶς , τί ἔτι ταρασσόμεθα , τί ἔτι φοβούμεθα ; περὶ ἃ ἐσπουδάκαμεν , τούτων ἐξουσίαν οὐδεὶς ἔχει ·
1.25.2 ὧν ἐξουσίαν οἱ ἄλλοι ἔχουσιν , τούτων οὐκ ἐπιστρεφόμεθα . ποῖον ἔτι πρᾶγμα ἔχομεν ;
1.25.3 — ἀλλὰ ἔντειλαί μοι . — τί σοι ἐντείλωμαι ; ὁ Ζεύς σοι οὐκ ἐντέταλται ; οὐ δέδωκέν σοι τὰ μὲν σὰ ἀκώλυστα καὶ ἀπαραπόδιστα , τὰ δὲ μὴ σὰ κωλυτὰ καὶ παραποδιστά ;