2.1.38 ἄλλοι μελετάτωσαν δίκας , ἄλλοι προβλήματα , ἄλλοι συλλογισμούς · σὺ ἀποθνῄσκειν , σὺ δεδέσθαι , σὺ στρεβλοῦσθαι , σὺ ἐξορίζεσθαι .
2.1.39 πάντα ταῦτα θαρρούντως , πεποιθότως τῷ κεκληκότι σε ἐπʹ αὐτά , τῷ ἄξιον τῆς χώρας ταύτης κεκρικότι , ἐν ᾗ καταταχθεὶς ἐπιδείξεις , τίνα δύναται λογικὸν ἡγεμονικὸν πρὸς τὰς ἀπροαιρέτους δυνάμεις ἀντιταξάμενον .
2.1.40 καὶ οὕτως τὸ παράδοξον ἐκεῖνο οὐκέτι οὔτʹ ἀδύνατον φανεῖται οὔτε παράδοξον , ὅτι ἅμα μὲν εὐλαβεῖσθαι δεῖ ἅμα δὲ θαρρεῖν , πρὸς μὲν τὰ ἀπροαίρετα θαρρεῖν , ἐν δὲ τοῖς προαιρετικοῖς εὐλαβεῖσθαι .
2.2.head περὶ ἀταραξίας .
2.2.1 ὅρα σὺ ὁ ἀπιὼν ἐπὶ τὴν δίκην , τί θέλεις τηρῆσαι καὶ ποῦ θέλεις ἀνύσαι .
2.2.2 εἰ γὰρ προαίρεσιν θέλεις τηρῆσαι κατὰ φύσιν ἔχουσαν , πᾶσά σοι ἀσφάλεια , πᾶσά σοι εὐμάρεια , πρᾶγμα οὐκ ἔχεις .
2.2.3 τὰ γὰρ ἐπὶ σοὶ αὐτεξούσια καὶ φύσει ἐλεύθερα θέλων τηρῆσαι καὶ τούτοις ἀρκούμενος τίνος ἔτι ἐπιστρέφῃ ; τίς γὰρ αὐτῶν κύριος , τίς αὐτὰ δύναται ἀφελέσθαι ;
2.2.4 εἰ θέλεις αἰδήμων εἶναι καὶ πιστός , τίς οὐκ ἐάσει σε ; εἰ θέλεις μὴ κωλύεσθαι μηδʹ ἀναγκάζεσθαι , τίς σε ἀναγκάσει ὀρέγεσθαι ὧν οὐ δοκεῖ σοι , τίς ἐκκλίνειν ἃ μὴ φαίνεταί σοι ;
2.2.5 ἀλλὰ τί ; πράξει μέν σοί τινα ἃ δοκεῖ φοβερὰ εἶναι · ἵνα δὲ καὶ ἐκκλίνων αὐτὰ πάθῃς , πῶς δύναται ποιῆσαι ;
2.2.6 ὅταν οὖν ἐπὶ σοὶ ᾖ τὸ ὀρέγεσθαι καὶ ἐκκλίνειν , τίνος ἔτι ἐπιστρέφῃ ;
2.2.7 τοῦτό σοι προοίμιον , τοῦτο διήγησις , τοῦτο πίστις , τοῦτο νίκη , τοῦτο ἐπίλογος , τοῦτο εὐδοκίμησις .