2.5.18 τοιγαροῦν Σωκράτης ᾔδει σφαιρίζειν . πῶς ; παίζειν ἐν τῷ δικαστηρίῳ . λέγε μοι , φησίν , Ἄνυτε , πῶς με φῂς θεὸν οὐ νομίζειν ; οἱ δαίμονές σοι τίνες εἶναι δοκοῦσιν ; οὐχὶ ἤτοι θεῶν παῖδές εἰσιν ἢ ἐξ ἀνθρώπων καὶ θεῶν μεμιγμένοι τινές ;
2.5.19 ὁμολογήσαντος δὲ τίς οὖν σοι δοκεῖ δύνασθαι ἡμιόνους μὲν ἡγεῖσθαι εἶναι , ὄνους δὲ μή ; ὡς ἁρπαστίῳ παίζων . καὶ τί ἐκεῖ ἐν μέσῳ ἁρπάστιον τότʹ ἦν ; τὸ δεδέσθαι , τὸ φυγαδευθῆναι , τὸ πιεῖν φάρμακον , τὸ γυναικὸς ἀφαιρεθῆναι , τὸ τέκνα ὀρφανὰ καταλιπεῖν .
2.5.20 ταῦτα ἦν ἐν μέσῳ οἷς ἔπαιζεν , ἀλλʹ οὐδὲν ἧττον ἔπαιζεν καὶ ἐσφαίριζεν εὐρύθμως . οὕτως καὶ ἡμεῖς τὴν μὲν ἐπιμέλειαν σφαιριστικωτάτην , τὴν δʹ ἀδιαφορίαν ὡς ὑπὲρ ἁρπαστίου .
2.5.21 δεῖ γὰρ πάντως περί τινα τῶν ἐκτὸς ὑλῶν φιλοτεχνεῖν , ἀλλʹ οὐκ ἐκείνην ἀποδεχόμενον , ἀλλʹ οἵα ἂν ᾖ ἐκείνη , τὴν περὶ αὐτὴν φιλοτεχνίαν ἐπιδεικνύοντα . οὕτως καὶ ὁ ὑφάντης οὐκ ἔρια ποιεῖ , ἀλλʹ οἷα ἂν παραλάβῃ περὶ αὐτὰ φιλοτεχνεῖ .
2.5.22 ἄλλος σοι δίδωσι τροφὰς καὶ κτῆσιν καὶ αὐτὰ ταῦτα δύναται ἀφελέσθαι καὶ τὸ σωμάτιον αὐτό . σὺ λοιπὸν παραλαβὼν τὴν ὕλην ἐργάζου . εἶτα ἂν ἐξέλθῃς μηδὲν παθών ,
2.5.23 οἱ μὲν ἄλλοι ἀπαντῶντές σοι συγχαρήσονται ὅτι ἐσώθης , ὁ δʹ εἰδὼς βλέπειν τὰ τοιαῦτα , ἂν μὲν ἴδῃ ὅτι εὐσχημόνως ἀνεστράφης ἐν τούτῳ , ἐπαινέσει καὶ συνησθήσεται · ἂν δὲ διʹ ἀσχημοσύνην τινὰ διασεσωσμένον , τὰ ἐναντία . ὅπου γὰρ τὸ χαίρειν εὐλόγως , ἐκεῖ καὶ τὸ συγχαίρειν .