3.10.18 δύο γὰρ ταῦτα πρόχειρα ἔχειν δεῖ · ὅτι ἔξω τῆς προαιρέσεως οὐδέν ἐστιν οὔτε ἀγαθὸν οὔτε κακὸν καὶ ὅτι οὐ δεῖ προηγεῖσθαι τῶν πραγμάτων , ἀλλʹ ἐπακολουθεῖν .
3.10.19 οὐκ ἔδει οὕτως μοι προσενεχθῆναι τὸν ἀδελφόν . οὔ · ἀλλὰ τοῦτο μὲν ἐκεῖνος ὄψεται . ἐγὼ δʹ , ὡς ἂν προσενεχθῇ , αὐτὸς ὡς δεῖ χρήσομαι τοῖς πρὸς ἐκεῖνον .
3.10.20 τοῦτο γὰρ ἐμόν ἐστιν , ἐκεῖνο δʹ ἀλλότριον · τοῦτο οὐδεὶς κωλῦσαι δύναται , ἐκεῖνο κωλύεται .
3.11.head σποράδην τινά .
3.11.1 εἰσί τινες ὡς ἐκ νόμου διατεταγμέναι κολάσεις τοῖς ἀπειθοῦσι τῇ θείᾳ διοικήσει ·
3.11.2 ὃς ἂν ἄλλο τι ἡγήσηται ἀγαθὸν παρὰ τὰ προαιρετικά , φθονείτω , ἐπιθυμείτω , κολακευέτω , ταρασσέσθω · ὃς ἂν ἄλλο κακόν , λυπείσθω , πενθείτω , θρηνείτω , δυστυχείτω .
3.11.3 καὶ ὅμως οὕτως πικρῶς κολαζόμενοι ἀποστῆναι οὐ δυνάμεθα . μέμνησο , τί λέγει ὁ ποιητὴς περὶ τοῦ ξένου ·
3.11.4 ξεῖνʹ , οὔ μοι θέμις ἔστʹι καὶ , οὐδʹ εἰ κακίων σέθεν ἔλθοι , ξεῖνον ἀτιμῆσαι · πρὸς γὰρ Διός εἰσιν ἅπαντες ξεῖνοί τε πτωχοί τε . τοῦτο οὖν καὶ ἐπὶ πατρὸς πρόχειρον ἔχειν ·
3.11.5 οὔ μοι θέμις ἔστʹ οὐδʹ εἰ κακίων σέθεν ἔλθοι , πατέρʹ ἀτιμῆσαι · πρὸς γὰρ Διός εἰσιν ἅπαντες τοῦ Πατρῴου ·
3.11.6 καὶ ἐπʹ ἀδελφῷ · πρὸς γὰρ Διός εἰσιν ἅπαντες τοῦ Ὁμογνίου . καὶ οὕτως κατὰ τὰς ἄλλας σχέσεις εὑρήσομεν ἐπόπτην τὸν Δία .
3.12.head περὶ ἀσκήσεως .
3.12.1 τὰς ἀσκήσεις οὐ δεῖ διὰ τῶν παρὰ φύσιν καὶ παραδόξων ποιεῖσθαι , ἐπεί τοι τῶν θαυματοποιῶν οὐδὲν διοίσομεν οἱ λέγοντες φιλοσοφεῖν .