3.12.9 τί οὖν ὧδε ποιεῖ τὸ φοίνικα στῆσαι ἢ τὸ στέγην δερματίνην καὶ ὅλμον καὶ ὕπερον περιφέρειν ;
3.12.10 ἄνθρωπε , ἄσκησον , εἰ γοργὸς εἶ , λοιδορούμενος ἀνέχεσθαι , ἀτιμασθεὶς μὴ ἀχθεσθῆναι . εἶθʹ οὕτως προσβήσῃ , ἵνα , κἂν πλήξῃ σέ τις , εἴπῃς αὐτὸς πρὸς αὑτὸν ὅτι δόξον ἀνδριάντα περιειληφέναι .
3.12.11 εἶτα καὶ οἰναρίῳ κομψῶς χρῆσθαι , μὴ εἰς τὸ πολὺ πίνειν ( καὶ γὰρ περὶ τοῦτο ἐπαρίστεροι ἀσκηταί εἰσιν ) , ἀλλὰ πρῶτον εἰς τὸ ἀποσχέσθαι , καὶ κορασιδίου ἀπέχεσθαι καὶ πλακουνταρίου . εἶτά ποτε ὑπὲρ δοκιμασίας , εἰ ἄρα , καθήσεις εὐκαίρως αὐτὸς σαυτὸν ὑπὲρ τοῦ γνῶναι , εἰ ὁμοίως ἡττῶσίν σε αἱ φαντασίαι .
3.12.12 τὰ πρῶτα δὲ φεῦγε μακρὰν ἀπὸ τῶν ἰσχυροτέρων . ἄνισος ἡ μάχη κορασιδίῳ κομψῷ πρὸς νέον ἀρχόμενον φιλοσοφεῖν · χύτρα , φασί , καὶ πέτρα οὐ συμφωνεῖ .
3.12.13 μετὰ τὴν ὄρεξιν καὶ τὴν ἔκκλισιν δεύτερος τρόπος ὁ περὶ τὴν ὁρμὴν καὶ ἀφορμήν · ἵνʹ εὐπειθὴς τῷ λόγῳ , ἵνα μὴ παρὰ καιρόν , μὴ παρὰ τόπον , μὴ παρὰ ἄλλην τινὰ τοιαύτην ἀσυμμετρίαν .
3.12.14 τρίτος ὁ περὶ τὰς συγκαταθέσεις , ὁ πρὸς τὰ πιθανὰ καὶ ἑλκυστικά .
3.12.15 ὡς γὰρ ὁ Σωκράτης ἔλεγεν ἀνεξέταστον βίον μὴ ζῆν , οὕτως ἀνεξέταστον φαντασίαν μὴ παραδέχεσθαι , ἀλλὰ λέγειν ἔκδεξαι , ἄφες ἴδω , τίς εἶ καὶ πόθεν ἔρχῃ , ὡς οἱ νυκτοφύλακες δεῖξόν μοι τὰ συνθήματα . ἔχεις τὸ παρὰ τῆς φύσεως σύμβολον , ὃ δεῖ τὴν παραδεχθησομένην ἔχειν φαντασίαν ;