3.26.23 , εἶτʹ ἆρον τὰς τραπέζας , σπόγγισον . τοῦτο φοβῇ , μὴ οὐ δύνῃ ζῆν ἀρρώστου βίον , ἐπεί τοι τὸν τῶν ὑγιαινόντων μάθε , πῶς οἱ δοῦλοι ζῶσιν , πῶς οἱ ἐργάται , πῶς οἱ γνησίως φιλοσοφοῦντες , πῶς Σωκράτης ἔζησεν , ἐκεῖνος μὲν καὶ μετὰ γυναικὸς καὶ παίδων , πῶς Διογένης , πῶς Κλεάνθης ἅμα σχολάζων καὶ ἀντλῶν .
3.26.24 ταῦτα ἂν θέλῃς ἔχειν , ἕξεις πανταχοῦ καὶ ζήσεις θαρρῶν . τίνι ; ᾧ μόνῳ θαρρεῖν ἐνδέχεται , τῷ πιστῷ , τῷ ἀκωλύτῳ , τῷ ἀναφαιρέτῳ , τοῦτʹ ἔστι τῇ προαιρέσει τῇ σεαυτοῦ .
3.26.25 διὰ τί δʹ οὕτως ἄχρηστον καὶ ἀνωφελῆ σαυτὸν παρεσκεύακας , ἵνα μηδείς σε εἰς οἰκίαν θέλῃ δέξασθαι , μηδεὶς ἐπιμεληθῆναι ; ἀλλὰ σκεῦος μὲν ὁλόκληρον καὶ χρήσιμον ἔξω ἐρριμμένον πᾶς τις εὑρὼν ἀναιρήσεται καὶ κέρδος ἡγήσεται , σὲ δʹ οὐδείς , ἀλλὰ πᾶς ζημίαν .
3.26.26 οὕτως οὐδὲ κυνὸς δύνασαι χρείαν παρασχεῖν οὐδʹ ἀλεκτρυόνος . τί οὖν ἔτι ζῆν θέλεις τοιοῦτος ὤν ;
3.26.27 φοβεῖταί τις ἀνὴρ ἀγαθός , μὴ λείπωσιν αὐτῷ τροφαί ; τοῖς τυφλοῖς οὐ λείπουσι , τοῖς χωλοῖς οὐ λείπουσι · λείψουσιν ἀνδρὶ ἀγαθῷ ; καὶ στρατιώτῃ μὲν ἀγαθῷ οὐ λείπει ὁ μισθοδοτῶν οὐδʹ ἐργάτῃ οὐδὲ σκυτεῖ · τῷ δʹ ἀγαθῷ λείψει ;
3.26.28 οὕτως ὁ θεὸς ἀμελεῖ τῶν αὑτοῦ ἐπιτευγμάτων , τῶν διακόνων , τῶν μαρτύρων , οἷς μόνοις χρῆται παραδείγμασιν πρὸς τοὺς ἀπαιδεύτους , ὅτι καὶ ἔστι καὶ καλῶς διοικεῖ τὰ ὅλα καὶ οὐκ ἀμελεῖ τῶν ἀνθρωπίνων πραγμάτων καὶ ὅτι ἀνδρὶ ἀγαθῷ οὐδέν ἐστι κακὸν οὔτε ζῶντι οὔτʹ ἀποθανόντι ;