4.1.175 ἡ τῶν οὐ παρόντων ἐπιθυμία . οὐ γὰρ ἐκπληρώσει τῶν ἐπιθυμουμένων ἐλευθερία παρασκευάζεται , ἀλλὰ ἀνασκευῇ τῆς ἐπιθυμίας .
4.1.176 καὶ ἵνʹ εἰδῇς , ὅτι ἀληθῆ ταῦτά ἐστιν , ὡς ἐκείνων ἕνεκα πεπόνηκας , οὕτως καὶ ἐπὶ ταῦτα μετάθες τὸν πόνον · ἀγρύπνησον ἕνεκα τοῦ δόγμα περιποιήσασθαι ἐλευθεροποιόν ,
4.1.177 θεράπευσον ἀντὶ γέροντος πλουσίου φιλόσοφον , περὶ θύρας ὄφθηται τὰς τούτου · οὐκ ἀσχημονήσεις ὀφθείς , οὐκ ἀπελεύσῃ κενὸς οὐδʹ ἀκερδής , ἂν ὡς δεῖ προσέλθῃς . εἰ δὲ μή , πείρασόν γʹ · οὐκ ἔστιν αἰσχρὰ ἡ πεῖρα .
4.2.head περὶ συμπεριφορᾶς .
4.2.1 τούτῳ τῷ τόπῳ πρὸ πάντων σε δεῖ προσέχειν , μή ποτε ἄρα τῶν προτέρων συνήθων ἢ φίλων ἀνακραθῇς τινι οὕτως , ὥστʹ εἰς τὰ αὐτὰ συγκαταβῆναι αὐτῷ · εἰ δὲ μή , ἀπολεῖς σεαυτόν .
4.2.2 ἂν δέ σʹ ὑποτρέχῃ ὅτι ἀδέξιος αὐτῷ φανοῦμαι καὶ οὐχ ὁμοίως ἕξει ὡς πρότερον , μέμνησο , ὅτι προῖκα οὐδὲν γίνεται οὐδʹ ἔστι δυνατὸν μὴ τὰ αὐτὰ ποιοῦντα μὴ τὸν αὐτὸν εἶναι τῷ ποτέ . ἐλοῦ οὖν πότερον θέλεις ,
4.2.3 ὁμοίως φιλεῖσθαι ὑφʹ ὧν πρότερον ὅμοιος ὢν τῷ πρότερον σεαυτῷ ἢ κρείσσων ὢν μὴ τυγχάνειν τῶν ἴσων .
4.2.4 εἰ γὰρ τοῦτο κρεῖσσον , αὐτόθεν ἀπόνευσον ἐπὶ τοῦτο μηδέ σε περισπάτωσαν οἱ ἕτεροι διαλογισμοί . οὐδεὶς γὰρ ἐπαμφοτερίζων δύναται προκόψαι , ἀλλʹ εἰ τοῦτο πάντων προκέκρικας , εἰ πρὸς τούτῳ μόνῳ θέλεις εἶναι , εἰ τοῦτο ἐκπονῆσαι , ἄφες ἅπαντα τἆλλα ·
4.2.5 εἰ δὲ μή , οὗτος ὁ ἐπαμφοτερισμὸς ἑκάτερόν σοι ποιήσει , οὔτε προκόψεις κατʹ ἀξίαν οὔτʹ ἐκείνων τεύξῃ , ὧν πρότερον ἐτύγχανες .