4.4.9 ὅταν λούῃ ; ὅταν γυμνάζῃ ; διὰ τί οὖν ἐπὶ πάντων οὐχ ὁμαλίζεις , καὶ ὅταν Καίσαρι προσίῃς καὶ ὅταν τῷ δεῖνι ; εἰ τὸν ἀπαθῆ τηρεῖς , εἰ τὸν ἀκατάπληκτον ,
4.4.10 εἰ τὸν κατεσταλμένον , εἰ βλέπεις μᾶλλον τὰ γινόμενα ἢ βλέπῃ , εἰ μὴ φθονεῖς τοῖς προτιμωμένοις , εἰ μὴ ἐκπλήσσουσίν σε αἱ ὗλαι , τί σοι λείπει ; βιβλία ; πῶς ἢ ἐπὶ τί ;
4.4.11 οὐχὶ γὰρ ἐπὶ τὸ βιοῦν παρασκευή τίς ἐστιν αὕτη ; τὸ βιοῦν δʹ ἐξ ἄλλων τινῶν ἢ τούτων συμπληροῦται . οἷον ἂν εἰ ὁ ἀθλητὴς κλαίῃ εἰς τὸ στάδιον εἰσιών , ὅτι μὴ ἔξω γυμνάζεται .
4.4.12 τούτων ἕνεκα ἐγυμνάζου , ἐπὶ τοῦτο οἱ ἁλτῆρες , ἡ ἁφή , οἱ νεανίσκοι . καὶ νῦν ἐκεῖνα ζητεῖς , ὅτε τοῦ ἔργου καιρός ἐστιν ;
4.4.13 οἷον εἰ ἐπὶ τοῦ συγκαταθετικοῦ τόπου παρισταμένων φαντασιῶν τῶν μὲν καταληπτικῶν , τῶν δʹ ἀκαταλήπτων μὴ ταύτας διακρίνειν θέλοιμεν , ἀλλʹ ἀναγιγνώσκειν τὰ Περὶ καταλήψεως .
4.4.14 τί οὖν τὸ αἴτιον ; ὅτι οὐδέποτε τούτου ἕνεκα ἀνέγνωμεν , οὐδέποτε τούτου ἕνεκα ἐγράψαμεν , ἵνʹ ἐπὶ τῶν ἔργων κατὰ φύσιν χρώμεθα ταῖς προσπιπτούσαις φαντασίαις , ἀλλʹ αὐτοῦ καταλήγομεν μαθεῖν , τί λέγεται , καὶ ἄλλῳ δύνασθαι ἐξηγήσασθαι , τὸν συλλογισμὸν ἀναλῦσαι καὶ τὸν ὑποθετικὸν ἐφοδεῦσαι .
4.4.15 διὰ τοῦτο ὅπου ἡ σπουδή , ἐκεῖ καὶ ὁ ἐμποδισμός . θέλεις τὰ μὴ ἐπὶ σοὶ ἐξ ἅπαντος ; κωλύου τοίνυν , ἐμποδίζου , ἀποτύγχανε .