4.5.8 ποῦ οὖν ἔτι μάχης τόπος τῷ οὕτως ἔχοντι ; μὴ γὰρ θαυμάζει τι τῶν γινομένων ; μὴ γὰρ καινὸν αὐτῷ φαίνεται ; μὴ γὰρ οὐ χείρονα καὶ χαλεπώτερα προσδέχεται τὰ παρὰ τῶν φαύλων ἢ ἀποβαίνει αὐτῷ ; μὴ γὰρ οὐ κέρδος λογίζεται πᾶν ὅ τι ἀπολείπουσιν τοῦ ἐσχάτου ;
4.5.9 ἐλοιδόρησέν σε ὁ δεῖνα . πολλὴ χάρις αὐτῷ , ὅτι μὴ ἔπληξεν . ἀλλὰ καὶ ἔπληξεν . πολλὴ χάρις , ὅτι μὴ ἔτρωσεν . ἀλλὰ καὶ ἔτρωσεν . πολλὴ χάρις , ὅτι μὴ ἀπέκτεινεν .
4.5.10 πότε γὰρ ἔμαθεν ἢ παρὰ τίνι , ὅτι ἥμερόν ἐστι ζῷον , ὅτι φιλάλληλον , ὅτι μεγάλη βλάβη τῷ ἀδικοῦντι αὐτὴ ἡ ἀδικία ; ταῦτα οὖν μὴ μεμαθηκὼς μηδὲ πεπεισμένος , διὰ τί μὴ ἀκολουθήσῃ τῷ φαινομένῳ συμφέροντι ;
4.5.11 βέβληκεν ὁ γείτων λίθους . μή τι οὖν σὺ ἡμάρτηκας ; ἀλλὰ τὰ ἐν οἴκῳ κατεάγη . σὺ οὖν σκευάριον εἶ ;
4.5.12 οὔ , ἀλλὰ προαίρεσις . τί οὖν σοι δίδοται πρὸς τοῦτο ; ὡς μὲν λύκῳ ἀντιδάκνειν καὶ ἄλλους πλείονας λίθους βάλλειν · ἀνθρώπῳ δʹ ἐὰν ζητῇς , ἐπίσκεψαί σου τὸ ταμιεῖον , ἴδε τίνας δυνάμεις ἔχων ἐλήλυθας · μή τι τὴν θηριώδη ; μή τι τὴν μνησικακητικήν ;
4.5.13 ἵππος οὖν πότʹ ἄθλιός ἐστιν ; ὅταν τῶν φυσικῶν δυνάμεων στέρηται · οὐχ ὅταν μὴ δύνηται κοκκύζειν , ἀλλʹ ὅταν μὴ τρέχειν . ὁ δὲ κύων ; ὅταν πέτεσθαι μὴ δύνηται ;