Χορός
41 παῖ γενναίων μὲν πατέρων
42 γενναίων τ’ ἐκ τοκάδων ,
43 πᾷ δή μοι νίσῃ σκοπέλους ;
44 οὐ τᾷδ’ ὑπήνεμος αὔρα
45 καὶ ποιηρὰ βοτάνα ;
46 δινᾶέν θ’ ὕδωρ ποταμῶν
47 ἐν πίστραις κεῖται πέλας ἄντρων ;
48 οὔ σοι βλαχαὶ τεκέων ;
49 — ψύττ’ · οὐ τᾷδ’ οὔ ; οὐ τᾷδε νεμῇ
50 κλιτὺν δροσεράν ;
51 ὠή , ῥίψω πέτρον τάχα σου
52 — ὕπαγ’ ὦ ὕπαγ’ ὦ κεράστα —
53 μηλοβότα στασιωρὸν
54 Κύκλωπος ἀγροβάτα .
55 σπαργῶντας μαστοὺς χάλασον ·
56 δέξαι θηλαῖσι { σπορὰς }
57 ἃς λείπεις ἀρνῶν θαλάμοις .
58 ποθοῦσί σ’ ἁμερόκοιτοι
59 βλαχαὶ σμικρῶν τεκέων .
60 εἰς αὐλὰν πότ’ ἀμφιβαλεῖς
61 ποιηροὺς λείπουσα νομοὺς
62 Αἰτναίων εἴσω σκοπέλων ;
62a { — νύττ’ · οὐ τᾷδ’ οὔ ; οὐ τᾷδε νεμῇ }
62b { κλιτὺν δροσεράν ; }
62c { ὠή , ῥίψω πέτρον τάχα σου }
62d { — ὕπαγ’ ὦ ὕπαγ’ ὦ κεράστα — }
62e { μηλοβότα στασιωρὸν }
62f { Κύκλωπος ἀγροβάτα . }
63 οὐ τάδε Βρόμιος , οὐ τάδε χοροὶ
64 Βάκχαι τε θυρσοφόροι ,
65 οὐ τυμπάνων ἀλαλαγμοὶ
66 κρήναις παρ’ ὑδροχύτοις ,
67 οὐκ οἴνου χλωραὶ σταγόνες ·
68 οὐδ’ ἐν Νύσᾳ μετὰ Νυμφᾶν
69 ἴακχον ἴακχον ᾠδὰν
70 μέλπω πρὸς τὰν Ἀφροδίταν ,
71 ἃν θηρεύων πετόμαν
72 Βάκχαις σὺν λευκόποσιν
73 ὦ φίλος ·
74 ὦ φίλε Βακχεῖε , ποῖ οἰοπολεῖς ;
75 { ποῖ } ξανθὰν χαίταν σείεις ;
76 ἐγὼ δ’ ὁ σὸς πρόπολος
77 θητεύω Κύκλωπι
78 τῷ μονοδέρκτᾳ δοῦλος ἀλαίνων
80 σὺν τᾷδε τράγου χλαίνᾳ μελέᾳ
81 σᾶς χωρὶς φιλίας .