1.1.2 ἡ γραμματικὴ μέχρι τίνος κέκτηται τὸ θεωρητικόν ; μέχρι τοῦ διαγνῶναι τὰ γράμματα . ἡ μουσική ; μέχρι τοῦ διαγνῶναι τὸ μέλος .
1.1.3 αὐτὴ οὖν αὑτὴν θεωρεῖ τις αὐτῶν ; οὐδαμῶς . ἀλλʹ ὅτε μέν , ἄν τι γράφῃς τῷ ἑταίρῳ , δεῖ τούτων τῶν γραπτέων , ἡ γραμματικὴ ἐρεῖ · πότερον δὲ γραπτέον τῷ ἑταίρῳ ἢ οὐ γραπτέον , ἡ γραμματικὴ οὐκ ἐρεῖ . καὶ περὶ τῶν μελῶν ὡσαύτως ἡ μουσική · πότερον δʹ ᾀστέον νῦν καὶ κιθαριστέον ἢ οὔτε ᾀστέον οὔτε κιθαριστέον οὐκ ἐρεῖ .
1.1.4 τίς οὖν ἐρεῖ ; ἡ καὶ αὑτὴν θεωροῦσα καὶ τἆλλα πάντα . αὕτη δʹ ἐστὶ τίς ; ἡ δύναμις ἡ λογική · μόνη γὰρ αὕτη καὶ αὑτὴν κατανοήσουσα παρείληπται , τίς τέ ἐστι καὶ τί δύναται καὶ πόσου ἀξία οὖσα ἐλήλυθεν , καὶ τὰς ἄλλας ἁπάσας .
1.1.5 τί γάρ ἐστιν ἄλλο τὸ λέγον ὅτι χρυσίον καλόν ἐστιν ; αὐτὸ γὰρ οὐ λέγει . δῆλον ὅτι ἡ χρηστικὴ δύναμις ταῖς φαντασίαις . τί ἄλλο τὸ μουσικήν ,
1.1.6 γραμματικήν , τὰς ἄλλας δυνάμεις διακρῖνον , δοκιμάζον τὰς χρήσεις αὐτῶν καὶ τοὺς καιροὺς παραδεικνύον ; οὐδὲν ἄλλο .
1.1.7 ὥσπερ οὖν ἦν ἄξιον , τὸ κράτιστον ἁπάντων καὶ κυριεῦον οἱ θεοὶ μόνον ἐφʹ ἡμῖν ἐποίησαν , τὴν χρῆσιν τὴν ὀρθὴν ταῖς φαντασίαις , τὰ δʹ ἄλλα οὐκ ἐφʹ ἡμῖν . ἆρά γε ὅτι οὐκ ἤθελον ;
1.1.8 ἐγὼ μὲν δοκῶ ὅτι , εἰ ἠδύναντο , κἀκεῖνα ἂν ἡμῖν ἐπέτρεψαν · ἀλλὰ πάντως οὐκ ἠδύναντο .