1.3.7 διὰ ταύτην τὴν συγγένειαν οἱ μὲν ἀποκλίναντες λύκοις ὅμοιοι γινόμεθα , ἄπιστοι καὶ ἐπίβουλοι καὶ βλαβεροί , οἱ δὲ λέουσιν , ἄγριοι καὶ θηριώδεις καὶ ἀνήμεροι , οἱ πλείους δʹ ἡμῶν ἀλώπεκες καὶ ὡς ἐν ζῴοις ἀτυχήματα .
1.3.8 τί γάρ ἐστιν ἄλλο λοίδορος καὶ κακοήθης ἄνθρωπος ἢ ἀλώπηξ ἢ τί ἄλλο ἀτυχέστερον καὶ ταπεινότερον ;
1.3.9 ὁρᾶτε οὖν καὶ προσέχετε , μή τι τούτων ἀποβῆτε τῶν ἀτυχημάτων .
1.4.head περὶ προκοπῆς .
1.4.1 ὁ προκόπτων μεμαθηκὼς παρὰ τῶν φιλοσόφων ὅτι ἡ μὲν ὄρεξις ἀγαθῶν ἐστιν , ἡ δʹ ἔκκλισις πρὸς κακά , μεμαθηκὼς δὲ καὶ ὅτι οὐκ ἄλλως τὸ εὔρουν καὶ ἀπαθὲς περιγίνεται τῷ ἀνθρώπῳ ἢ ἐν ὀρέξει μὲν μὴ ἀποτυγχάνοντι , ἐν ἐκκλίσει δὲ μὴ περιπίπτοντι , τὴν μὲν ὄρεξιν ἦρκεν ἐξ αὑτοῦ εἰσάπαν καὶ ὑπερτέθειται , τῇ ἐκκλίσει δὲ πρὸς μόνα χρῆται τὰ προαιρετικά .
1.4.2 τῶν γὰρ ἀπροαιρέτων ἄν τι ἐκκλίνῃ , οἶδεν ὅτι περιπεσεῖταί ποτέ τινι παρὰ τὴν ἔκκλισιν τὴν αὑτοῦ καὶ δυστυχήσει .
1.4.3 εἰ δʹ ἡ ἀρετὴ ταύτην ἔχει τὴν ἐπαγγελίαν εὐδαιμονίαν ποιῆσαι καὶ ἀπάθειαν καὶ εὔροιαν , πάντως καὶ ἡ προκοπὴ ἡ πρὸς αὐτὴν πρὸς ἕκαστον τούτων ἐστὶ προκοπή .
1.4.4 ἀεὶ γὰρ πρὸς ὃ ἂν ἡ τελειότης τινὸς καθάπαξ ἄγῃ , πρὸς αὐτὸ ἡ προκοπὴ συνεγγισμός ἐστιν . πῶς οὖν τὴν μὲν ἀρετὴν τοιοῦτόν τι ὁμολογοῦμεν ,
1.4.5 τὴν προκοπὴν δʹ ἐν ἄλλοις ζητοῦμεν καὶ ἐπιδείκνυμεν ; τί ἔργον ἀρετῆς ;
1.4.6 εὔροια . τίς οὖν προκόπτει ; ὁ πολλὰς Χρυσίππου συντάξεις ἀνεγνωκώς ;