1.4.7 μὴ γὰρ ἡ ἀρετὴ τοῦτʹ ἔστι Χρύσιππον νενοηκέναι ; εἰ γὰρ τοῦτʹ ἔστιν , ὁμολογουμένως ἡ προκοπὴ οὐδὲν ἄλλο ἐστὶν ἢ τὸ πολλὰ τῶν Χρυσίππου νοεῖν .
1.4.8 νῦν δʹ ἄλλο μέν τι τὴν ἀρετὴν ἐπιφέρειν ὁμολογοῦμεν , ἄλλον δὲ τὸν συνεγγισμόν , τὴν προκοπὴν ἀποφαίνομεν .
1.4.9 οὗτος , φησίν , ἤδη καὶ διʹ αὑτοῦ δύναται Χρύσιππον ἀναγιγνώσκειν . εὖ , νὴ τοὺς θεούς , προκόπτεις , ἄνθρωπε · ποίαν προκοπήν .
1.4.10 τί ἐμπαίζεις αὐτῷ ; τί δʹ ἀπάγεις αὐτὸν τῆς συναισθήσεως τῶν αὑτοῦ κακῶν ; οὐ θέλεις δεῖξαι αὐτῷ τὸ ἔργον τῆς ἀρετῆς , ἵνα μάθῃ ποῦ τὴν προκοπὴν ζητῇ ;
1.4.11 ἐκεῖ ζήτησον αὐτήν , ταλαίπωρε , ὅπου σου τὸ ἔργον . ποῦ δέ σου τὸ ἔργον ; ἐν ὀρέξει καὶ ἐκκλίσει , ἵνʹ ἀναπότευκτος ᾖς καὶ ἀπερίπτωτος , ἐν ὁρμαῖς καὶ ἀφορμαῖς , ἵνʹ ἀναμάρτητος , ἐν προσθέσει καὶ ἐποχῇ , ἵνʹ ἀνεξαπάτητος .
1.4.12 πρῶτοι δʹ εἰσὶν οἱ πρῶτοι τόποι καὶ ἀναγκαιότατοι . ἂν δὲ τρέμων καὶ πενθῶν ζητῇς ἀπερίπτωτος εἶναι , ἄρα πῶς προκόπτεις ;
1.4.13 σὺ οὖν ἐνταῦθά μοι δεῖξόν σου τὴν προκοπήν . καθάπερ εἰ ἀθλητῇ διελεγόμην δεῖξόν μοι τοὺς ὤμους , εἶτα ἔλεγεν ἐκεῖνος ἴδε μου τοὺς ἁλτῆρας . ὄψει σὺ καὶ οἱ ἁλτῆρες , ἐγὼ τὸ ἀποτέλεσμα τῶν ἁλτήρων ἰδεῖν βούλομαι .
1.4.14 λάβε τὴν περὶ ὁρμῆς σύνταξιν καὶ γνῶθι πῶς αὐτὴν ἀνέγνωκα . ἀνδράποδον , οὐ τοῦτο ζητῶ , ἀλλὰ πῶς ὁρμᾷς καὶ ἀφορμᾷς , πῶς ὀρέγῃ καὶ ἐκκλίνεις , πῶς ἐπιβάλλῃ καὶ προστίθεσαι καὶ παρασκευάζῃ , πότερα συμφώνως τῇ φύσει ἢ ἀσυμφώνως .