1.5.6 οὔ , φησίν · οὐδὲ γάρ , ὅταν ἐν τοῖς ὕπνοις φαντάζωμαι , ὅτι ἐγρήγορα . οὐδὲν οὖν διαφέρει αὕτη ἡ φαντασία ἐκείνης ; οὐδέν . ἔτι τούτῳ διαλέγομαι ;
1.5.7 καὶ ποῖον αὐτῷ πῦρ ἢ ποῖον σίδηρον προσαγάγω , ἵνʹ αἴσθηται ὅτι νενέκρωται ; αἰσθανόμενος οὐ προσποιεῖται · ἔτι χείρων ἐστὶ τοῦ νεκροῦ . μάχην οὗτος οὐ συνορᾷ · κακῶς ἔχει .
1.5.8 συνορῶν οὗτος οὐ κινεῖται οὐδὲ προκόπτει · ἔτι ἀθλιώτερον ἔχει .
1.5.9 ἐκτέτμηται τὸ αἰδῆμον αὐτοῦ καὶ ἐντρεπτικὸν καὶ τὸ λογικὸν οὐκ ἀποτέτμηται , ἀλλʹ ἀποτεθηρίωται .
1.5.10 ταύτην ἐγὼ δύναμιν εἴπω ; μὴ γένοιτο , εἰ μὴ καὶ τὴν τῶν κιναίδων , καθʹ ἣν πᾶν τὸ ἐπελθὸν ἐν μέσῳ καὶ ποιοῦσι καὶ λέγουσι .
1.6.head περὶ προνοίας .
1.6.1 ἀφʹ ἑκάστου τῶν ἐν τῷ κόσμῳ γινομένων ῥᾴδιόν ἐστιν ἐγκωμιάσαι τὴν πρόνοιαν , ἂν δύο ἔχῃ τις ταῦτα ἐν ἑαυτῷ , δύναμίν τε συνορατικὴν τῶν γεγονότων ἑκάστῳ καὶ τὸ εὐχάριστον .
1.6.2 εἰ δὲ μή , ὁ μὲν οὐκ ὄψεται τὴν εὐχρηστίαν τῶν γεγονότων , ὁ δʹ οὐκ εὐχαριστήσει ἐπʹ αὐτοῖς οὐδʹ ἂν
1.6.3 ἴδῃ . χρώματα ὁ θεὸς εἰ πεποιήκει , δύναμιν δὲ θεατικὴν αὐτῶν μὴ πεποιήκει , τί ἂν ἦν ὄφελος ;
1.6.4 — οὐδʹ ὁτιοῦν . — ἀλλʹ ἀνάπαλιν εἰ τὴν μὲν δύναμιν πεποιήκει , τὰ ὄντα δὲ μὴ τοιαῦτα οἷα ὑποπίπτειν τῇ δυνάμει τῇ ὁρατικῇ , καὶ οὕτως τί ὄφελος ;
1.6.5 — οὐδʹ ὁτιοῦν .