1.6.13 ἆρʹ οὖν καὶ παρακολουθεῖ τοῖς γινομένοις ἐκεῖνα ; οὐδαμῶς . ἄλλο γάρ ἐστι χρῆσις καὶ ἄλλο παρακολούθησις . ἐκείνων χρείαν εἶχεν ὁ θεὸς χρωμένων ταῖς φαντασίαις , ἡμῶν δὲ παρακολουθούντων τῇ χρήσει .
1.6.14 διὰ τοῦτο ἐκείνοις μὲν ἀρκεῖ τὸ ἐσθίειν καὶ πίνειν καὶ τὸ ἀναπαύεσθαι καὶ ὀχεύειν καὶ τἆλλʹ ὅσα ἐπιτελεῖ τῶν αὑτῶν ἕκαστον , ἡμῖν δʹ , οἷς καὶ τὴν παρακολουθητικὴν δύναμιν ἔδωκεν ,
1.6.15 οὐκέτι ταῦτʹ ἀπαρκεῖ , ἀλλʹ ἂν μὴ κατὰ τρόπον καὶ τεταγμένως καὶ ἀκολούθως τῇ ἑκάστου φύσει καὶ κατασκευῇ πράττωμεν , οὐκέτι τοῦ τέλους τευξόμεθα τοῦ ἑαυτῶν .
1.6.16 ὧν γὰρ αἱ κατασκευαὶ διάφοροι , τούτων καὶ τὰ ἔργα καὶ τὰ τέλη .
1.6.17 οὗ τοίνυν ἡ κατασκευὴ μόνον χρηστική , τούτῳ χρῆσθαι ὁπωσοῦν ἀπαρκεῖ · οὗ δὲ καὶ παρακολουθητικὴ τῇ χρήσει , τούτῳ τὸ κατὰ τρόπον ἂν μὴ προσῇ οὐδέποτε τεύξεται τοῦ τέλους .
1.6.18 τί οὖν ; ἐκείνων ἕκαστον κατασκευάζει τὸ μὲν ὥστʹ ἐσθίεσθαι , τὸ δʹ ὥστε ὑπηρετεῖν εἰς γεωργίαν , τὸ δʹ ὥστε τυρὸν φέρειν , τὸ δʹ ἄλλο ἐπʹ ἄλλῃ χρείᾳ παραπλησίῳ , πρὸς ἃ τίς χρεία τοῦ παρακολουθεῖν ταῖς φαντασίαις καὶ ταύτας διακρίνειν δύνασθαι ;
1.6.19 τὸν δʹ ἄνθρωπον θεατὴν εἰσήγαγεν αὐτοῦ τε καὶ τῶν ἔργων τῶν αὐτοῦ , καὶ οὐ μόνον θεατήν , ἀλλὰ καὶ ἐξηγητὴν αὐτῶν .
1.6.20 διὰ τοῦτο αἰσχρόν ἐστι τῷ ἀνθρώπῳ ἄρχεσθαι καὶ καταλήγειν ὅπου καὶ τὰ ἄλογα , ἀλλὰ μᾶλλον ἔνθεν μὲν ἄρχεσθαι , καταλήγειν δὲ ἐφʹ ὃ κατέληξεν ἐφʹ ἡμῶν καὶ ἡ φύσις .