1.6.21 κατέληξεν δʹ ἐπὶ θεωρίαν καὶ παρακολούθησιν καὶ σύμφωνον διεξαγωγὴν τῇ φύσει . ὁρᾶτε οὖν , μὴ ἀθέατοι τούτων ἀποθάνητε .
1.6.23 ἀλλʹ εἰς Ὀλυμπίαν μὲν ἀποδημεῖτε , ἵνʹ εἴδητε τὸ ἔργον τοῦ Φειδίου , καὶ ἀτύχημα ἕκαστος ὑμῶν οἴεται τὸ ἀνιστόρητος τούτων ἀποθανεῖν ·
1.6.24 ὅπου δʹ οὐδʹ ἀποδημῆσαι χρεία ἐστίν , ἀλλʹ ἐστὲ ἤδη καὶ πάρεστε τοῖς ἔργοις , ταῦτα δὲ θεάσασθαι καὶ κατανοῆσαι οὐκ ἐπιθυμήσετε ;
1.6.25 οὐκ αἰσθήσεσθε τοίνυν , οὔτε τίνες ἐστὲ οὔτʹ ἐπὶ τί γεγόνατε οὔτε ἐπὶ τί τοῦτό ἐστιν , ἐφʹ οὗ τὴν θέαν παρείληφθε ;
1.6.26 — ἀλλὰ γίνεταί τινα ἀηδῆ καὶ χαλεπὰ ἐν τῷ βίῳ . — ἐν Ὀλυμπίᾳ δʹ οὐ γίνεται ; οὐ καυματίζεσθε ; οὐ στενοχωρεῖσθε ; οὐ κακῶς λούεσθε ; οὐ καταβρέχεσθε , ὅταν βρέχῃ ; θορύβου δὲ καὶ βοῆς καὶ τῶν ἄλλων χαλεπῶν οὐκ ἀπολαύετε ;
1.6.27 ἀλλʹ οἶμαι ὅτι ταῦτα πάντα ἀντιτιθέντες πρὸς τὸ ἀξιόλογον τῆς θέας φέρετε καὶ ἀνέχεσθε . ἄγε δυνάμεις δʹ οὐκ εἰλήφατε ,
1.6.28 καθʹ ἃς οἴσετε πᾶν τὸ συμβαῖνον ; μεγαλοψυχίαν οὐκ εἰλήφατε ; ἀνδρείαν οὐκ εἰλήφατε ;
1.6.29 καρτερίαν οὐκ εἰλήφατε ; καὶ τί ἔτι μοι μέλει μεγαλοψύχῳ ὄντι τῶν ἀποβῆναι δυναμένων ; τί μʹ ἐκστήσει ἢ ταράξει ἢ τί ὀδυνηρὸν φανεῖται ; οὐ χρήσομαι τῇ δυνάμει πρὸς ἃ εἴληφα αὐτήν , ἀλλʹ ἐπὶ τοῖς ἀποβαίνουσιν πενθήσω καὶ στενάξω ;
1.6.30 ναί · ἀλλʹ αἱ μύξαι μου ῥέουσιν . τίνος οὖν ἕνεκα χεῖρας ἔχεις , ἀνδράποδον ; οὐχ ἵνα καὶ ἀπομύσσῃς σεαυτόν ;
1.6.31 — τοῦτο οὖν εὔλογον μύξας γίνεσθαι ἐν τῷ κόσμῳ ;