1.11.28 τί οὖν τοῦτό ἐστιν ; τὸ μὲν ἀκριβὲς οὐ τοῦ παρόντος καιροῦ τυχόν · ἐκεῖνο δʹ ἀπαρκεῖ πεισθῆναι , εἴπερ ὑγιές ἐστι τὸ ὑπὸ τῶν φιλοσόφων λεγόμενον , ὅτι οὐκ ἔξω που δεῖ ζητεῖν αὐτό , ἀλλʹ ἓν καὶ ταὐτόν ἐστιν ἐπὶ πάντων τὸ αἴτιον τοῦ ποιεῖν τι ἡμᾶς ἢ μὴ ποιεῖν , τοῦ λέγειν τινὰ ἢ μὴ λέγειν , τοῦ ἐπαίρεσθαι ἢ συστέλλεσθαι ἢ φεύγειν τινὰ ἢ διώκειν ,
1.11.29 τοῦθʹ ὅπερ καὶ νῦν ἐμοί τε καὶ σοὶ γέγονεν αἴτιον , σοὶ μὲν τοῦ ἐλθεῖν πρὸς ἐμὲ καὶ καθῆσθαι νῦν ἀκούοντα , ἐμοὶ δὲ τοῦ λέγειν ταῦτα .
1.11.30 τί δʹ ἐστὶ τοῦτο ; ἆρά γε ἄλλο ἢ ὅτι ἔδοξεν ἡμῖν ; — οὐδέν . — εἰ δʹ ἄλλως ἡμῖν ἐφάνη , τί ἂν ἄλλο ἢ τὸ δόξαν ἐπράττομεν ;
1.11.31 οὐκ οὖν καὶ τῷ Ἀχιλλεῖ τοῦτο αἴτιον τοῦ πενθεῖν , οὐχ ὁ τοῦ Πατρόκλου θάνατος ( ἄλλος γάρ τις οὐ πάσχει ταῦτα τοῦ ἑταίρου ἀποθανόντος )
1.11.32 , ἀλλʹ ὅτι ἔδοξεν αὐτῷ . καὶ σοὶ τότε φεύγειν τοῦτο αὐτὸ ὅτι ἔδοξέν σοι · καὶ πάλιν , ἐὰν μείνῃς , ὅτι ἔδοξέν σοι . καὶ νῦν ἐν Ῥώμῃ ἀνέρχῃ , ὅτι δοκεῖ σοι · κἂν μεταδόξῃ , οὐκ ἂν ἀπελεύσῃ .
1.11.33 καὶ ἁπλῶς οὔτε θάνατος οὔτε φυγὴ οὔτε πόνος οὔτε ἄλλο τι τῶν τοιούτων αἴτιόν ἐστι τοῦ πράττειν τι ἢ μὴ πράττειν ἡμᾶς , ἀλλʹ ὑπολήψεις καὶ δόγματα . τοῦτό σε πείθω ἢ οὐχί ;