1.27.15 ἐρχέσθω καὶ ἀπαντάτω Πυρρώνειος καὶ Ἀκαδημαικός . ἐγὼ μὲν γὰρ τὸ ἐμὸν μέρος οὐκ ἄγω σχολὴν πρὸς ταῦτα οὐδὲ δύναμαι συνηγορῆσαι τῇ συνηθείᾳ .
1.27.16 εἰ καὶ περὶ ἀγριδίου πραγμάτιον εἶχον , ἄλλον ἂν παρεκάλεσα τὸν συνηγορήσοντα · τίνι οὖν ἀρκοῦμαι κατὰ τὸν τόπον ; πῶς μὲν αἴσθησις γίνεται ,
1.27.17 πρότερον διʹ ὅλων ἢ ἀπὸ μέρους , ἴσως οὐκ οἶδα ἀπολογίσασθαι , ταράσσει δέ με ἀμφότερα . ὅτι δʹ ἐγὼ καὶ σὺ οὐκ ἐσμὲν οἱ αὐτοί , λίαν ἀκριβῶς οἶδα .
1.27.18 πόθεν τοῦτο ; οὐδέποτε καταπίνειν τι θέλων ἐκεῖ φέρω τὸν ψωμόν , ἀλλʹ ὧδε · οὐδέποτʹ ἄρτον θέλων λαβεῖν τὸ σάρον ἔλαβον , ἀλλʹ ἀεὶ ἐπὶ τὸν ἄρτον ἔρχομαι ὡς πρὸς σκοπόν .
1.27.19 ὑμεῖς δʹ αὐτοὶ οἱ τὰς αἰσθήσεις ἀναιροῦντες ἄλλο τι ποιεῖτε ; τίς ὑμῶν εἰς βαλανεῖον ἀπελθεῖν θέλων εἰς μυλῶνα ἀπῆλθεν ;
1.27.20 — τί οὖν ; οὐ δεῖ κατὰ δύναμιν καὶ τούτων ἀντέχεσθαι , τοῦ τηρῆσαι τὴν συνήθειαν , τοῦ πεφράχθαι πρὸς τὰ κατʹ αὐτῆς ;
1.27.21 — καὶ τίς ἀντιλέγει ; ἀλλὰ τὸν δυνάμενον , τὸν σχολάζοντα · τὸν δὲ τρέμοντα καὶ ταρασσόμενον καὶ ῥηγνύμενον ἔσωθεν τὴν καρδίαν ἄλλῳ τινὶ δεῖ προσευκαιρεῖν .
1.28.head ὅτι οὐ δεῖ χαλεπαίνειν ἀνθρώποις καὶ τίνα τὰ μικρὰ καὶ μεγάλα ἐν ἀνθρώποις .
1.28.1 τί ἐστιν αἴτιον τοῦ συγκατατίθεσθαί τινι ; τὸ φαίνεσθαι ὅτι ὑπάρχει . τῷ οὖν φαινομένῳ ὅτι οὐχ ὑπάρχει συγκατατίθεσθαι οὐχ οἷόν τε . διὰ τί ; ὅτι ἡ φύσις αὕτη ἐστὶ τῆς διανοίας τοῖς μὲν ἀληθέσιν ἐπινεύειν , τοῖς δὲ ψευδέσι δυσαρεστεῖν , πρὸς δὲ τὰ ἄδηλα ἐπέχειν .