2.16.4 τί οὖν θαυμάζεις , εἰ , ὅπου μὲν μεμελέτηκας , ἐκεῖ κρείττων γένῃ σεαυτοῦ , ὅπου δʹ ἀμελετήτως ἔχεις , ἐκεῖ δʹ ὁ αὐτὸς διαμένεις ;
2.16.5 ἐπεὶ διὰ τί ὁ ῥήτωρ εἰδὼς ὅτι γέγραφε καλῶς , ὅτι ἀνείληφε τὰ γεγραμμένα , φωνὴν εἰσφέρων ἡδεῖαν ὅμως ἔτι ἀγωνιᾷ ; ὅτι οὐκ ἀρκεῖται τῷ μελετῆσαι .
2.16.6 τί οὖν θέλεις ; ἐπαινεθῆναι ὑπὸ τῶν παρόντων . πρὸς μὲν οὖν τὸ δύνασθαι μελετᾶν ἤσκηται , πρὸς ἔπαινον δὲ καὶ ψόγον οὐκ ἤσκηται .
2.16.7 πότε γὰρ ἤκουσεν παρά τινος , τί ἐστιν ἔπαινος , τί ἐστι ψόγος , τίς ἑκατέρου φύσις ; τοὺς ποίους τῶν ἐπαίνων διωκτέον ἢ τοὺς ποίους τῶν ψόγων φευκτέον ; πότε δʹ ἐμελέτησεν ταύτην τὴν μελέτην ἀκόλουθον τούτοις τοῖς λόγοις ;
2.16.8 τί οὖν ἔτι θαυμάζεις , εἰ , ὅπου μὲν ἔμαθεν , ἐκεῖ διαφέρει τῶν ἄλλων , ὅπου δʹ οὐ μεμελέτηκεν , ἐκεῖ τοῖς πολλοῖς ὁ αὐτός ἐστιν ;
2.16.9 ὡς ὁ κιθαρῳδὸς οἶδεν κιθαρίζειν , ᾁδει καλῶς , στατὸν ἔχει καλὸν καὶ ὅμως εἰσερχόμενος τρέμει · ταῦτα γὰρ οἶδεν , ὄχλος δὲ τί ἐστιν οὐκ οἶδεν οὐδʹ ὄχλου βοὴ οὐδὲ κατάγελως .
2.16.10 ἀλλʹ οὐδʹ αὐτὸ τὸ ἀγωνιᾶν τί ἐστιν οἶδεν , πότερον ἡμέτερον ἔργον ἐστὶν ἢ ἀλλότριον , ἔστιν αὐτὸ παῦσαι ἢ οὐκ ἔστιν . διὰ τοῦτο ἐὰν μὲν ἐπαινεθῇ , φυσηθεὶς ἐξῆλθεν · ἐὰν δὲ καταγελασθῇ , τὸ φυσημάτιον ἐκεῖνο ἐκεντήθη καὶ προσεκάθισεν .