3.3.head τίς ὕλη τοῦ ἀγαθοῦ καὶ πρὸς τί μάλιστʹ ἀσκητέον .
3.3.1 ὕλη τοῦ καλοῦ καὶ ἀγαθοῦ τὸ ἴδιον ἡγεμονικόν , τὸ σῶμα δʹ ἰατροῦ καὶ ἀπἀλείπτου , ὁ ἀγρὸς γεωργοῦ ὕλη · ἔργον δὲ καλοῦ καὶ ἀγαθοῦ τὸ χρῆσθαι ταῖς φαντασίαις κατὰ φύσιν .
3.3.2 πέφυκεν δὲ πᾶσα ψυχὴ ὥσπερ τῷ ἀληθεῖ ἐπινεύειν , πρὸς τὸ ψεῦδος ἀνανεύειν , πρὸς τὸ ἄδηλον ἐπέχειν , οὕτως πρὸς μὲν τὸ ἀγαθὸν ὀρεκτικῶς κινεῖσθαι , πρὸς δὲ τὸ κακὸν ἐκκλιτικῶς , πρὸς δὲ τὸ μήτε κακὸν μήτʹ ἀγαθὸν οὐδετέρως .
3.3.3 ὡς γὰρ τὸ τοῦ Καίσαρος νόμισμα οὐκ ἔξεστιν ἀποδοκιμάσαι τῷ τραπεζίτῃ οὐδὲ τῷ λαχανοπώλῃ , ἀλλʹ ἂν δείξῃς , θέλει οὐ θέλει , προέσθαι αὐτὸν δεῖ τὸ ἀντʹ αὐτοῦ πωλούμενον , οὕτως ἔχει καὶ ἐπὶ τῆς ψυχῆς .
3.3.4 τὸ ἀγαθὸν φανὲν εὐθὺς ἐκίνησεν ἐφʹ αὑτό , τὸ κακὸν ἀφʹ αὑτοῦ . οὐδέποτε δʹ ἀγαθοῦ φαντασίαν ἐναργῆ ἀποδοκιμάσει ψυχή , οὐ μᾶλλον ἢ τὸ Καίσαρος νόμισμα . ἔνθεν ἐξήρτηται πᾶσα κίνησις καὶ ἀνθρώπου καὶ θεοῦ .
3.3.5 διὰ τοῦτο πάσης οἰκειότητος προκρίνεται τὸ ἀγαθόν . οὐδὲν ἐμοὶ καὶ τῷ πατρί , ἀλλὰ τῷ ἀγαθῷ . οὕτως εἶ σκληρός ; οὕτως γὰρ πέφυκα · τοῦτό μοι τὸ νόμισμα δέδωκεν ὁ θεός .
3.3.6 διὰ τοῦτο , εἰ τοῦ καλοῦ καὶ δικαίου τὸ ἀγαθὸν ἕτερόν ἐστιν , οἴχεται καὶ πατὴρ καὶ ἀδελφὸς καὶ πατρὶς καὶ πάντα τὰ πράγματα .
3.3.7 ἀλλʹ ἐγὼ τὸ ἐμὸν ἀγαθὸν ὑπερίδω , ἵνα σὺ σχῇς , καὶ παραχωρήσω σοι ; ἀντὶ τίνος ; πατήρ σου εἰμί . ἀλλʹ οὐκ ἀγαθόν . ἀδελφός σου εἰμί .