3.3.14 πρὸς τοῦτο μάλιστα τὸ εἶδος αὑτὸν γυμναστέον . εὐθὺς ὄρθρου προελθὼν ὃν ἂν ἴδῃς , ὃν ἂν ἀκούσῃς , ἐξέταζε , ἀποκρίνου ὡς πρὸς ἐρώτημα . τί εἶδες ; καλὸν ἢ καλήν ; ἔπαγε τὸν κανόνα . ἀπροαίρετον ἢ προαιρετικόν ; ἀπροαίρετον · αἶρε ἔξω .
3.3.15 τί εἶδες ; πενθοῦντʹ ἐπὶ τέκνου τελευτῇ ; ἔπαγε τὸν κανόνα . ὁ θάνατός ἐστιν ἀπροαίρετον · αἶρε ἐκ τοῦ μέσου . ἀπήντησέ σοι ὕπατος ; ἔπαγε τὸν κανόνα . ὑπατεία ποῖόν τι ἐστίν ; ἀπροαίρετον ἢ προαιρετικόν ; ἀπροαίρετον · αἶρε καὶ τοῦτο , οὐκ ἔστι δόκιμον · ἀπόβαλε , οὐδὲν πρὸς σέ .
3.3.16 καὶ τοῦτο εἰ ἐποιοῦμεν καὶ πρὸς τοῦτο ἠσκούμεθα καθʹ ἡμέραν ἐξ ὄρθρου μέχρι νυκτός , ἐγίνετο ἄν τι , νὴ τοὺς θεούς .
3.3.17 νῦν δʹ εὐθὺς ὑπὸ πάσης φαντασίας κεχηνότες λαμβανόμεθα καὶ μόνον , εἴπερ ἄρα , ἐν τῇ σχολῇ μικρόν τι διεγειρόμεθα · εἶτʹ ἐξελθόντες ἂν ἴδωμεν πενθοῦντα , λέγομεν ἀπώλετο · ἂν ὕπατον , μακάριος · ἂν ἐξωρισμένον , ταλαίπωρος · ἂν πένητα ,
3.3.18 ἄθλιος , οὐκ ἔχει πόθεν φάγῃ . ταῦτʹ οὖν ἐκκόπτειν δεῖ τὰ πονηρὰ δόγματα , περὶ τοῦτο συντετάσθαι . τί γάρ ἐστι τὸ κλαίειν καὶ οἰμώζειν ; δόγμα . τί δυστυχία ; δόγμα . τί στάσις , τί διχόνοια , τί μέμψις , τί κατηγορία , τί ἀσέβεια , τί φλυαρία ;