3.3.19 ταῦτα πάντα δόγματά ἐστι καὶ ἄλλο οὐδὲν καὶ δόγματα περὶ τῶν ἀπροαιρέτων ὡς ὄντων ἀγαθῶν καὶ κακῶν . ταῦτά τις ἐπὶ τὰ προαιρετικὰ μεταθέτω , κἀγὼ αὐτὸν ἐγγυῶμαι ὅτι εὐσταθήσει , ὡς ἂν ἔχῃ τὰ περὶ αὐτόν .
3.3.20 οἷόν ἐστιν ἡ λεκάνη τοῦ ὕδατος , τοιοῦτον ἡ ψυχή , οἷον ἡ αὐγὴ ἡ προσπίπτουσα τῷ ὕδατι , τοιοῦτον αἱ φαντασίαι .
3.3.21 ὅταν οὖν τὸ ὕδωρ κινηθῇ , δοκεῖ μὲν καὶ ἡ αὐγὴ κινεῖσθαι , οὐ μέντοι κινεῖται .
3.3.22 καὶ ὅταν τοίνυν σκοτωθῇ τις , οὐχ αἱ τέχναι καὶ αἱ ἀρεταὶ συγχέονται , ἀλλὰ τὸ πνεῦμα , ἐφʹ οὗ εἰσιν · καταστάντος δὲ καθίσταται κἀκεῖνα .
3.4.head πρὸς τὸν ἀκόσμως ἐν θεάτρῳ σπουδάσαντα .
3.4.1 τοῦ δʹ ἐπιτρόπου τῆς Ἠπείρου ἀκοσμότερον σπουδάσαντος κωμῳδῷ τινι καὶ ἐπὶ τούτῳ δημοσίᾳ λοιδορηθέντος , εἶτα ἑξῆς ἀπαγγείλαντος πρὸς αὐτόν , ὅτι ἐλοιδορήθη , καὶ ἀγανακτοῦντος πρὸς τοὺς λοιδορήσαντας Καὶ τί κακόν , ἔφη , ἐποίουν ; ἐσπούδαζον καὶ οὗτοι ὡς καὶ σύ .
3.4.2 εἰπόντος δʹ ἐκείνου Οὕτως οὖν τις σπουδάζει ; σέ , ἔφη , βλέποντες τὸν αὐτῶν ἄρχοντα , τοῦ Καίσαρος φίλον καὶ ἐπίτροπον , οὕτως σπουδάζοντα οὐκ ἔμελλον καὶ αὐτοὶ οὕτως σπουδάζειν ;
3.4.3 εἰ γὰρ μὴ δεῖ οὕτως σπουδάζειν , μηδὲ σὺ σπούδαζε · εἰ δὲ δεῖ , τί χαλεπαίνεις , εἴ σε ἐμιμήσαντο ; τίνας γὰρ ἔχουσιν μιμήσασθαι οἱ πολλοὶ ἢ τοὺς ὑπερέχοντας ὑμᾶς ; εἰς τίνας ἀπίδωσιν ἐλθόντες εἰς τὰ θέατρα ἢ ὑμᾶς ;