3.20.8 ὕστερον γὰρ οὐκ ἀπέθανεν ; παύσασθε , τοὺς θεοὺς ὑμῖν , τὰς ὕλας θαυμάζοντες , παύσασθʹ ἑαυτοὺς δούλους ποιοῦντες πρῶτον τῶν πραγμάτων , εἶτα διʹ αὐτὰ καὶ τῶν ἀνθρώπων τῶν ταῦτα περιποιεῖν ἢ ἀφαιρεῖσθαι δυναμένων . ἔστιν οὖν ἀπὸ τούτων ὠφεληθῆναι ;
3.20.9 — ἀπὸ πάντων . — καὶ ἀπὸ τοῦ λοιδοροῦντος ; — τί δʹ ὠφελεῖ τὸν ἀθλητὴν ὁ προσγυμναζόμενος ; τὰ μέγιστα . καὶ οὗτος ἐμοῦ προγυμναστὴς γίνεται · τὸ ἀνεκτικόν μου γυμνάζει , τὸ ἀόργητον , τὸ πρᾷον .
3.20.10 οὔ · ἀλλʹ ὁ μὲν τοῦ τραχήλου καθάπτων καὶ τὴν ὀσφῦν μου καὶ τοὺς ὤμους καταρτίζων ὠφελεῖ με καὶ ὁ ἀλείπτης καλῶς ποιῶν λέγει ἆρον ὕπερον ἀμφοτέραις καὶ ὅσῳ βαρύτερός ἐστιν ἐκεῖνος , τοσούτῳ μᾶλλον ὠφελοῦμαι ἐγώ · εἰ δέ τις πρὸς ἀοργησίαν με γυμνάζει , οὐκ ὠφελεῖ με ;
3.20.11 τοῦτʹ ἔστι τὸ μὴ εἰδέναι ἀπʹ ἀνθρώπων ὠφελεῖσθαι . κακὸς γείτων ; αὑτῷ · ἀλλʹ ἐμοὶ ἀγαθός · γυμνάζει μου τὸ εὔγνωμον , τὸ ἐπιεικές .
3.20.12 κακὸς πατήρ ; αὑτῷ · ἀλλʹ ἐμοὶ ἀγαθός . τοῦτʹ ἔστι τὸ τοῦ Ἑρμοῦ ῥαβδίον · οὗ θέλεις , φησίν , ἅψαι καὶ χρυσοῦν ἔσται . οὔ · ἀλλʹ ὃ θέλεις φέρε κἀγὼ αὐτὸ ἀγαθὸν ποιήσω . φέρε νόσον , φέρε θάνατον , φέρε ἀπορίαν , φέρε λοιδορίαν , δίκην τὴν περὶ τῶν ἐσχάτων · πάντα ταῦτα τῷ ῥαβδίῳ τοῦ Ἑρμοῦ ὠφέλιμα ἔσται .
3.20.13 τὸν θάνατον τί ποιήσεις ; τί γὰρ ἄλλο ἢ ἵνα σε κοσμήσῃ ἢ ἵνα δείξῃσε ἔργῳ διʹ αὐτοῦ , τί ἐστιν ἄνθρωπος τῷ βουλήματι τῆς φύσεως παρακολουθῶν ;