3.21.3 ἀλλʹ ἀπʹ αὐτῶν ἀναδοθέντων δεῖξόν τινα ἡμῖν μεταβολὴν τοῦ ἡγεμονικοῦ τοῦ σεαυτοῦ , ὡς οἱ ἀθληταὶ τοὺς ὤμους , ἀφʹ ὧν ἐγυμνάσθησαν καὶ ἔφαγον , ὡς οἱ τὰς τέχνας ἀναλαβόντες , ἀφʹ ὧν ἔμαθον .
3.21.4 οὐκ ἔρχεται ὁ τέκτων καὶ λέγει ἀκούσατέ μου διαλεγομένου περὶ τῶν τεκτονικῶν , ἀλλʹ ἐκμισθωσάμενος οἰκίαν ταύτην κατασκευάσας δείκνυσιν , ὅτι ἔχει τὴν τέχνην .
3.21.5 τοιοῦτόν τι καὶ σὺ ποίησον · φάγε ὡς ἄνθρωπος , πίε ὡς ἄνθρωπος , κοσμήθητι , γάμησον , παιδοποίησον , πολίτευσαι · ἀνάσχου λοιδορίας , ἔνεγκε ἀδελφὸν ἀγνώμονα , ἔνεγκε πατέρα , ἔνεγκε υἱόν , γείτονα , σύνοδον .
3.21.6 ταῦτα ἡμῖν δεῖξον , ἵνʹ ἴδωμεν , ὅτι μεμάθηκας ταῖς ἀληθείαις τι τῶν φιλοσόφων . οὔ · ἀλλʹ ἐλθόντες ἀκούσατέ μου σχόλια λέγοντος . ὕπαγε , ζήτει τίνων κατεξεράσεις .
3.21.7 καὶ μὴν ἐγὼ ὑμῖν ἐξηγήσομαι τὰ Χρυσίππεια ὡς οὐδείς , τὴν λέξιν διαλύσω καθαρώτατα , προσθήσω ἄν που καὶ Ἀντιπάτρου καὶ Ἀρχεδήμου φοράν .
3.21.8 εἶτα τούτου ἕνεκα ἀπολίπωσιν οἱ νέοι τὰς πατρίδας καὶ τοὺς γονεῖς τοὺς αὑτῶν , ἵνʹ ἐλθόντες λεξείδιά σου ἐξηγουμένου ἀκούσωσιν ;
3.21.9 οὐ δεῖ αὐτοὺς ὑποστρέψαι ἀνεκτικούς , συνεργητικούς , ἀπαθεῖς , ἀταράχους , ἔχοντάς τι ἐφόδιον τοιοῦτον εἰς τὸν βίον , ἀφʹ οὗ ὁρμώμενοι φέρειν δυνήσονται τὰ συμπίπτοντα καλῶς καὶ κοσμεῖσθαι ὑπʹ αὐτῶν ;
3.21.10 καὶ πόθεν σοι μεταδιδόναι τούτων ὧν οὐκ ἔχεις ; αὐτὸς γὰρ ἄλλο τι ἐποίησας ἐξ ἀρχῆς ἢ περὶ ταῦτα κατετρίβης , πῶς οἱ συλλογισμοὶ ἀναλυθήσονται , πῶς οἱ μεταπίπτοντες , πῶς οἱ τῷ ἠρωτῆσθαι περαίνοντες ;