3.24.75 τί λέγεις πρὸς τοῦτον τὸν δουλαγωγοῦντά σε ; ποῖον αὐτῷ καρπιστὴν δίδως ; ἢ οὐδʹ ὅλως ἀντιβλέπεις , ἀλλʹ ἀφεὶς τοὺς πολλοὺς λόγους ἱκετεύεις , ἵνα ἀφεθῇς ;
3.24.76 ἄνθρωπε , εἰς φυλακήν σε δεῖ χαίροντα ἀπιέναι , σπεύδοντα , φθάνοντα τοὺς ἀπάγοντας . εἶτά μοι σὺ μὲν ἐν Ῥώμῃ διάγειν ὀκνεῖς , τὴν Ἑλλάδα ποθεῖς ; ὅταν δʹ ἀποθνῄσκειν δέῃ , καὶ τότε μέλλεις ἡμῶν κατακλαίειν , ὅτι τὰς Ἀθήνας οὐ μέλλεις βλέπειν καὶ ἐν Λυκείῳ οὐ περιπατήσεις ;
3.24.77 ἐπὶ τοῦτο ἀπεδήμησας ; τούτου ἕνεκα ἐζήτησάς τινι συμβαλεῖν , ἵνʹ ὠφεληθῇς ὑπʹ αὐτοῦ ; ποίαν ὠφέλειαν ; συλλογισμοὺς ἵνʹ ἀναλύσῃς ἑκτικώτερον ἢ ἐφοδεύσης ὑποθετικούς ; καὶ διὰ ταύτην τὴν αἰτίαν ἀδελφὸν ἀπέλιπες , πατρίδα , φίλους , οἰκείους , ἵνα ταῦτα μαθὼν ἐπανέλθῃς ; ὥστʹ οὐχ ὑπὲρ εὐσταθείας ἀπεδήμεις ,
3.24.78 οὐχ ὑπὲρ ἀταραξίας , οὐχ ἵνʹ ἀβλαβὴς γενόμενος μηκέτι μηδένα μέμφῃ , μηδενὶ ἐγκαλῇς , μηδείς σε ἀδικῇ καὶ οὕτως τὰς σχέσεις ἀποσῴζῃς ἀπαραποδίστως ;
3.24.79 καλὴν ἐστείλω ταύτην τὴν ἐμπορίαν , συλλογισμοὺς καὶ μεταπίπτοντας καὶ ὑποθετικούς · κἄν σοι φανῇ , ἐν τῇ ἀγορᾷ καθίσας πρόγραψον ὡς οἱ φαρμακοπῶλαι .
3.24.80 οὐκ ἀρνήσῃ καὶ ὅσα ἔμαθες εἰδέναι , ἵνα μὴ διαβάλῃς τὰ θεωρήματα ὡς ἄχρηστα ; τί σοι κακὸν ἐποίησεν φιλοσοφία ; τί σε ἠδίκησε Χρύσιππος , ἵνʹ αὐτοῦ τοὺς πόνους ἔργῳ αὐτὸς ἀχρήστους ἐξελέγχῃς ; οὐκ ἤρκει σοι τὰ ἐκεῖ κακά , ὅσα εἶχες αἴτια τοῦ λυπεῖσθαι καὶ πενθεῖν , εἰ καὶ μὴ ἀπεδήμησας , ἀλλὰ πλείω προσέλαβες ;