Greek Reader — Epictetus, Discourses (4.1.162

4.1.162 ταῦτα ἀπαρεγχείρητα , ἀνυπότακτα . εἶθʹ ὅτʹ ἀπολογεῖσθαι ἔδει ὑπὲρ τοῦ ζῆν , μή τι ὡς τέκνα ἔχων ἀναστρέφεται , μή τι ὡς γυναῖκα ; ἀλλʹ ὡς μόνος . τί δʹ , ὅτε πιεῖν ἔδει τὸ φάρμακον , πῶς ἀναστρέφεται ;

4.1.163 δυνάμενος διασωθῆναι καὶ τοῦ Κρίτωνος αὐτῷ λέγοντος ὅτι ἔξελθε διὰ τὰ παιδία τί λέγει ; ἕρμαιον ἡγεῖτο αὐτό ; πόθεν ; ἀλλὰ τὸ εὔσχημον σκοπεῖ , τἆλλα δʹ οὐδʹ ὁρᾷ , οὐδʹ ἐπιλογίζεται . οὐ γὰρ ἤθελεν , φησίν , σῶσαι τὸ σωμάτιον , ἀλλʹ ἐκεῖνο , ὃ τῷ δικαίῳ μὲν αὔξεται καὶ σῴζεται , τῷ δʹ ἀδίκῳ μειοῦται καὶ ἀπόλλυται . Σωκράτης δʹ αἰσχρῶς οὐ σῴζεται ,

4.1.164 ὁ μὴ ἐπιψηφίσας Ἀθηναίων κελευόντων , ὁ τοὺς τυράννους ὑπεριδών , ὁ τοιαῦτα περὶ ἀρετῆς καὶ καλοκἀγαθίας διαλεγόμενος · τοῦτον οὐκ ἔστι σῶσαι αἰσχρῶς ,

4.1.165 ἀλλʹ ἀποθνῄσκων σῴζεται , οὐ φεύγων . καὶ γὰρ ὁ ἀγαθὸς ὑποκριτὴς παυόμενος ὅτε δεῖ σῴζεται μᾶλλον ἢ ὑποκρινόμενος παρὰ καιρόν .

4.1.166 τί οὖν ποιήσει τὰ παιδία ; εἰ μὲν εἰς Θετταλίαν ἀπῄειν , ἐπεμελήθητε αὐτῶν · εἰς Ἅιδου δέ μου ἀποδημήσαντος οὐδεὶς ἔσται ὁ ἐπιμελησόμενος ; ὅρα , πῶς ὑποκορίζεται καὶ σκώπτει τὸν θάνατον .

4.1.167 εἰ δʹ ἐγὼ καὶ σὺ ἦμεν , εὐθὺς ἂν καταφιλοσοφήσαντες ὅτι τοὺς ἀδικοῦντας δεῖ τοῖς ἴσοις ἀμύνεσθαι καὶ προσθέντες ὅτι ὄφελος ἔσομαι πολλοῖς ἀνθρώποις σωθείς , ἀποθανὼν δʹ οὐδενί , εἰ γἄρʹ ἔδει διὰ τρώγλης ἐκδύντας , ἐξήλθομεν ἄν .

Morphology & Lexicon ( hover to peek ✧ click to lock )

Morphology & Lexicon
( hover to peek ✧ click to lock )