4.6.23 ἐγὼ δʹ οὔτε πεινῶ οὔτε διψῶ οὔτε ῥιγῶ , ἀλλʹ ἀφʹ ὧν αὐτοὶ πεινῶσιν ἢ διψῶσιν οἴονται κἀμέ . τί οὖν αὐτοῖς ποιήσω ; περιερχόμενος κηρύσσω καὶ λέγω μὴ πλανᾶσθε , ἄνδρες , ἐμοὶ καλῶς ἐστιν · οὔτε πενίας ἐπιστρέφομαι οὔτε ἀναρχίας οὔτε ἁπλῶς ἄλλου οὐδενὸς ἢ δογμάτων ὀρθῶν · ταῦτα ἔχω ἀκώλυτα , οὐδενὸς πεφρόντικα ἔτι ;
4.6.24 καὶ τίς αὕτη φλυαρία ; πῶς ἔτι ὀρθὰ δόγματα ἔχω μὴ ἀρκούμενος τῷ εἶναι ὅς εἰμι , ἀλλʹ ἐπτοημένος ὑπὲρ τοῦ δοκεῖν ;
4.6.25 ἀλλʹ ἄλλοι πλειόνων τεύξονται καὶ προτιμηθήσονται . — τί οὖν εὐλογώτερον ἢ τοὺς περί τι ἐσπουδακότας ἐν ἐκείνῳ πλεῖον ἔχειν , ἐν ᾧ ἐσπουδάκασιν ; περὶ ἀρχὰς ἐσπουδάκασιν , σὺ περὶ δόγματα · καὶ περὶ πλοῦτον , σὺ περὶ τὴν χρῆσιν τῶν φαντασιῶν .
4.6.26 ὅρα , εἰ ἐν τούτῳ σου πλέον ἔχουσιν , περὶ ὃ σὺ μὲν ἐσπούδακας , ἐκεῖνοι δʹ ἀμελοῦσιν · εἰ συγκατατίθενται μᾶλλον περὶ τὰ φυσικὰ μέτρα , εἰ ὀρέγονταί σου ἀναποτευκτότερον , εἰ ἐκκλίνουσιν ἀπεριπτωτότερον , εἰ ἐν ἐπιβολῇ , ἐν προθέσει , εἰ ἐν ὁρμῇ μᾶλλον εὐστοχοῦσιν , εἰ τὸ πρέπον σῴζουσιν ὡς ἄνδρες , ὡς υἱοί , ὡς γονεῖς , εἶθʹ ἑξῆς κατὰ τὰ ἄλλα τῶν σχέσεων ὀνόματα .
4.6.27 εἰ δʹ ἄρχουσιν ἐκεῖνοι , σὺ δʹ οὐ θέλεις σαυτῷ τὰς ἀληθείας εἰπεῖν , ὅτι σὺ μὲν οὐδὲν τούτου ἕνεκα ποιεῖς , ἐκεῖνοι δὲ πάντα , ἀλογώτατον δὲ τὸν ἐπιμελούμενόν τινος ἔλαττον φέρεσθαι οὐ ἢ τὸν ἀμελοῦντα ;