4.6.34 σὺ δʹ εἴπερ ταῖς ἀληθείαις οὐδενὸς ἄλλου πεφρόντικας ἢ χρήσεως οἵας δεῖ φαντασιῶν , εὐθὺς ἀναστὰς ἕωθεν ἐνθυμοῦ τίνα μοι λείπει πρὸς ἀπάθειαν ; τίνα πρὸς ἀταραξίαν ; τίς εἰμι ; μή τι σωμάτιον , μή τι κτῆσις , μή τι φήμη ; οὐδὲν τούτων . ἀλλὰ τί ;
4.6.35 λογικόν εἰμι ζῷον . τίνα οὖν τὰ ἀπαιτήματα ; ἀναπόλει τὰ πεπραγμένα . πῇ παρέβην τῶν πρὸς εὔροιαν ; τί ἔρεξα ἢ ἄφιλον ἢ ἀκοινώνητον ἢ ἄγνωμον ; τί μοι δέον οὐκ ἐτελέσθη πρὸς ταῦτα ;
4.6.36 τοσαύτης οὖν διαφορᾶς οὔσης τῶν ἐπιθυμουμένων , τῶν ἔργων , τῶν εὐχῶν ἔτι θέλεις τὸ ἴσον ἔχειν ἐκείνοις , περὶ ἃ σὺ μὲν οὐκ ἐσπούδακας , ἐκεῖνοι δʹ ἐσπουδάκασιν ;
4.6.37 εἶτα θαυμάζεις , εἴ σʹ ἐλεοῦσιν , καὶ ἀγανακτεῖς ; ἐκεῖνοι δʹ οὐκ ἀγανακτοῦσιν , εἰ σὺ αὐτοὺς ἐλεεῖς . διὰ τί ; ὅτι ἐκεῖνοι μὲν πεπεισμένοι εἰσίν , ὅτι ἀγαθῶν τυγχάνουσιν , σὺ δʹ οὐ πέπεισαι .
4.6.38 διὰ τοῦτο σὺ μὲν οὐκ ἀρκῇ τοῖς σοῖς , ἀλλʹ ἐφίεσαι τῶν ἐκείνων · ἐκεῖνοι δʹ ἀρκοῦνται τοῖς ἑαυτῶν καὶ οὐκ ἐφίενται τῶν σῶν . ἐπεί τοι εἰ ταῖς ἀληθείαις ἐπέπεισο , ὅτι περὶ τὰ ἀγαθὰ σὺ ὁ ἐπιτυγχάνων εἶ , ἐκεῖνοι δʹ ἀποπεπλάνηνται , οὐδʹ ἂν ἐνεθυμοῦ , τί λέγουσι περὶ σοῦ .
4.7.head περὶ ἀφοβίας .
4.7.1 τί ποιεῖ φοβερὸν τὸν τύραννον ; — οἱ δορυφόροι , φησίν , καὶ αἱ μάχαιραι αὐτῶν καὶ ὁ ἐπὶ τοῦ κοιτῶνος καὶ οἱ ἀποκλείοντες τοὺς εἰσιόντας .