4.8.40 ἄφες ἡμᾶς γε κατὰ φύσιν πεπανθῆναι . τί ἡμᾶς ἀποδύεις , τί βιάζῃ ; οὔπω δυνάμεθα ἐνεγκεῖν τὸν ἀέρα . ἔασον τὴν ῥίζαν αὐξηθῆναι , εἶτα γόνυ λαβεῖν τὸ πρῶτον , εἶτα τὸ δεύτερον , εἶτα τὸ τρίτον · εἶθʹ οὕτως ὁ καρπὸς ἐκβιάσεται τὴν φύσιν , κἂν ἐγὼ μὴ θέλω .
4.8.41 τίς γὰρ ἐγκύμων γενόμενος καὶ πλήρης τηλικούτων δογμάτων οὐχὶ αἰσθάνεταί τε τῆς αὑτοῦ παρασκευῆς καὶ ἐπὶ τὰ κατάλληλα ἔργα ὁρμᾷ ;
4.8.42 ἀλλὰ ταῦρος μὲν οὐκ ἀγνοεῖ τὴν αὑτοῦ φύσιν καὶ παρασκευήν , ὅταν ἐπιφανῇ τι θηρίον , οὐδʹ ἀναμένει τὸν προτρεψόμενον , οὐδὲ κύων , ὅταν ἴδῃ τι τῶν ἀγρίων ζῴων ·
4.8.43 ἐγὼ δʹ ἂν ἴσχω τὴν ἀνδρὸς ἀγαθοῦ παρασκευήν , ἐκδέξομαι , ἵνα με σὺ παρασκευάσῃς ἐπὶ τὰ οἰκεῖα ἔργα ; νῦν δʹ οὔπω ἔχω , πίστευσόν μοι . τί οὖν με πρὸ ὥρας ἀποξηρᾶναι θέλεις , ὡς αὐτὸς ἐξηράνθης ;
4.9.head πρὸς τὸν εἰς ἀναισχυντίαν μεταβληθέντα .
4.9.1 ὅταν ἄλλον ἴδῃς ἄρχοντα , ἀντίθες , ὅτι σὺ ἔχεις τὸ μὴ δεῖσθαι ἀρχῆς · ὅταν ἄλλον πλουτοῦντα , ἰδοῦ , τί ἀντὶ τούτου ἔχεις .
4.9.2 εἰ μὲν γὰρ μηδὲν ἔχεις ἀντʹ αὐτοῦ , ἄθλιος εἶ · εἰ δʹ ἔχεις τὸ μὴ χρείαν ἔχειν πλούτου , γίγνωσκε , ὅτι πλεῖον ἔχεις καὶ πολλῷ πλείονος ἄξιον . ἄλλος γυναῖκα εὔμορφον ,