4.10.32 ναί , φησίν , ἀλλʹ ᾤμην , ὅτι ἐκεῖνος ἐπιβιώσεταί μοι καὶ αὐξήσει μου τὸν υἱόν . μωρὸς γὰρ ἦς καὶ τὰ ἄδηλα ᾤου . τί οὖν οὐκ ἐγκαλεῖς σεαυτῷ , ἀλλὰ κλαίων κάθησαι ὡς τὰ κοράσια ;
4.10.33 ἀλλʹ ἐκεῖνός μοι φαγεῖν παρετίθει . ἔζη γάρ , μωρέ · νῦν δʹ οὐ δύναται . ἀλλʹ Αὐτομέδων σοι παραθήσει · ἂν δὲ καὶ Αὐτομέδων ἀποθάνῃ , ἄλλον εὑρήσεις .
4.10.34 ἂν δʹ ἡ χύτρα , ἐν ᾗ ἥψετό σοι τὸ κρέας , καταγῇ , λιμῷ σε δεῖ ἀποθανεῖν , ὅτι μὴ ἔχεις τὴν συνήθη χύτραν ; οὐ πέμπεις καὶ ἄλλην καινὴν ἀγοράζεις ; οὐ μὲν γάρ τι ,
4.10.35 φησίν , κακώτερον ἄλλο πάθοιμι . τοῦτο γάρ σοι κακόν ἐστιν ; εἶτʹ ἀφεὶς τοῦτο ἐξελεῖν αἰτιᾷ τὴν μητέρα , ὅτι σοι οὐ προεῖπεν , ἵνʹ ὀδυνώμενος ἐξ ἐκείνου διατελῇς ;
4.10.36 τί δοκεῖτε ; μὴ ἐπίτηδες ταῦτα συνθεῖναι Ὅμηρον , ἵνʹ ἴδωμεν , ὅτι οἱ εὐγενέστατοι , οἱ ἰσχυρότατοι , οἱ πλουσιώτατοι , οἱ εὐμορφότατοι , ὅταν οἷα δεῖ δόγματα μὴ ἔχωσιν , οὐδὲν κωλύονται ἀθλιώτατοι εἶναι καὶ δυστυχέστατοι ;
4.11.head περὶ καθαριότητος .
4.11.1 ἀμφισβητοῦσί τινες , εἰ ἐν τῇ φύσει τοῦ ἀνθρώπου περιέχεται τὸ κοινωνικόν · ὅμως δʹ αὐτοὶ οὗτοι οὐκ ἄν μοι δοκοῦσιν ἀμφισβητῆσαι , ὅτι τό γε καθάριον πάντως περιέχεται καὶ εἴ τινι ἄλλῳ καὶ τούτῳ τῶν ζῴων χωρίζεται .