4.12.4 σήμερον παῖξαι θέλω . τί οὖν κωλύει προσέχοντα ; ᾆσαι . τί οὖν κωλύει προσέχοντα ; μὴ γὰρ ἐξαιρεῖταί τι μέρος τοῦ βίου , ἐφʹ ὃ οὐ διατείνει τὸ προσέχειν ; χεῖρον γὰρ αὐτὸ προσέχων ποιήσεις , βέλτιον δὲ μὴ προσέχων ;
4.12.5 καὶ τί ἄλλο τῶν ἐν τῷ βίῳ κρεῖσσον ὑπὸ τῶν μὴ προσεχόντων γίνεται ; ὁ τέκτων μὴ προσέχων ; ὁ κυβερνήτης μὴ προσέχων κυβερνᾷ ἀσφαλέστερον ; ἄλλο δέ τι τῶν μικροτέρων ἔργων ὑπὸ ἀπροσεξίας ἐπιτελεῖται κρεῖσσον ;
4.12.6 οὐκ αἰσθάνῃ , ὅτι , ἐπειδὰν ἀφῇς τὴν γνώμην , οὐκ ἔτι ἐπὶ σοί ἐστιν ἀνακαλέσασθαι αὐτήν , οὐκ ἐπὶ τὸ εὔσχημον , οὐκ ἐπὶ τὸ αἰδῆμον , οὐκ ἐπὶ τὸ κατεσταλμένον ; ἀλλὰ πᾶν τὸ ἐπελθὸν ποιεῖς , ταῖς προθυμίαις ἐπακολουθεῖς . τίσιν οὖν δεῖ με προσέχειν ;
4.12.7 — πρῶτον μὲν ἐκείνοις τοῖς καθολικοῖς καὶ ἐκεῖνα πρόχειρα ἔχειν καὶ χωρὶς ἐκείνων μὴ καθεύδειν , μὴ ἀνίστασθαι , μὴ πίνειν , μὴ ἐσθίειν , μὴ συμβάλλειν ἀνθρώποις · ὅτι προαιρέσεως ἀλλοτρίας κύριος οὐδείς , ἐν ταύτῃ δὲ μόνῃ τἀγαθὸν καὶ κακόν .
4.12.8 οὐδεὶς οὖν κύριος οὔτʹ ἀγαθόν μοι περιποιῆσαι οὔτε κακῷ με περιβαλεῖν , ἀλλʹ ἐγὼ αὐτὸς ἐμαυτοῦ κατὰ ταῦτα ἐξουσίαν ἔχω μόνος .
4.12.9 ὅταν οὖν ταῦτα ἀσφαλῆ μοι ᾖ , τί ἔχω περὶ τὰ ἐκτὸς ταράσσεσθαι ; ποῖος τύραννος φοβερός , ποία νόσος , ποία πενία , ποῖον πρόσκρουσμα ;